Успешна донаторска акција спроведена од добрите луѓе – за неполн ден собрани се повеќе од 45.000 денари за мајката со три малолетни деца Рената од Кочани да не остане на улица.
Ова е направено благодарение на апелот на новинарката Мери Јордановска која ја објасни тешката состојба за младата мајка со децата поради неплатена кирија за 8 месеци, исклучена струја во станот поради долг за струја и опомена за неплатен долг со закана од напата преку извршител.
Многу граѓани ја виделе пораката на социјалните мрежи упатиле средства и во текот на вчерашниот ден уплатена е кирија за семејството до декември 2025 година, исплатен е долгот за струја, домот на семејството е повторно приклучено на струја, малку радост од избегнатиот ризик да останат без покрив над глава.
- „Да можев сите, со име и со презиме, да ве набројам овде – сите што дониравте за семејството од Кочани, ја запаливте струјата во темнината во која живееја и им овозможивте да останат во својот дом – ќе го направев тоа, но голем број од вас кои донираа инсистираа да не бидат објавени јавно. Затоа само ќе кажам – вашите имиња се синоним за големи човечки души полни со емпатија и човечност и зборуваат дека големи луѓе се оние кои всушност живеат за малите, беспомошните“ – напиша од благодарност Мери Јордановска.
Таа сподели фотографија од 6 месечното најмало дете во семејството Јагода, за која се собираа и средства за памперси, кашички и други артикли за да расте здраво и згрижено, без да и’ задава очај на мајката која се соочува со беспарица и болен сопруг со дијагноза карцином.
Сопругот беше на печалба во Германија иако бил свесен за тешката дијагноза, но сакал да обезбеди средства за живот за семејството. Но, канцерот не му дозволил да издржи таму повеќе од три месеци. Итно е вратен во Македонија на лекување и од вчера е пациент на Клиниката за онкологија во Скопје.
– „Ова е 6-месечната Јагода – мала душа која постојано се смее. Вие денеска ја спасивте, да ја задржи насмевката, домот и да си го дочека својот татко“ – напиша на социјалните мрежи Јордановска.
– „Сега, најубавите вести – сметките за струја на семејството од Кочани се подмирени. Киријата е платена, не само долгот, туку до декември 2025 година. Купени се пелени, хигиенски средства, храна, сите најосновни работи за семејството да може да функционира во тешкиот период што следува. Дел од парите ќе им бидат доставени на семејството, а дел ќе ги чувам, за да видиме како ќе тече лекувањето на 40-годишниот Игорчо кој боледува од карцином.
ELS – Eco Logistic Service е спремен за достава, откако утре ќе ги дособерам сите донации, бидејќи денеска во колата (a богами ни во станот) не ги собираше сите.
Редовно ќе ве информирам за судбината на ова семејство и нема да се срамам повторно да побарам помош, ако е потребна. Денеска сфатив дека овие луѓе се срамат од сиромаштијата, како небаре нешто да згрешиле, иако крвнички работат и се трудат да им обезбедат најдобри услови на своите деца. Затоа јас решив да проговорам во нивно име и бескрајно сум ви благодарна што ми верувавте и ме слушнавте“ – вели новинарката Мери Јордановска.
Благодарност на добрите луѓе кои се одзваа на апелот за помош што го проследивме и на страниците на GevgelijNet!
АПЕЛ за ПОМОШ: Млада 33 годишна мајка со три деца се соочува со исселување од станот
