Одењето на отслужување воен рок во времето од 50-те години на минатиот век претставуваше празник за фамилијата и роднините - со песни и зурли и тапани се испраќаа младите момци на Железничката станица во Гевгелија од страна на бројните роднини, пријатели, другари, соседи.
Да бидеш војник беше чест, зошто така ја докажуваа младоста, способноста и мажевноста да бидат обучени за чувари на својата земја.
Во времето на Титова југославија функционираше ЈНА (Југословенската народна армија) во која служеа војска сите млади од 18 до 27 годишна возраст.
Во послевоениот период од Југославија војската се служеше 2 години, а регрутите редовно беа упатувани во друга република од составот на СФРЈ заради осознавање на територијалната ширина на земјата, разните народи и народности кои ја сочинуваа државата, заради јакнење на единството на Југословенската Народна Армија.
Не им сметаше далечината. Сите на фотографијата се насмеани, и војниците кои од отпуст се враќаат во касарните, и младите регрути кои треба да го започнат отслужувањето на воениот рок.
Колку знаење, дисциплина, одговорност и незаборавни војнички другарства понесоа со себе после отслужувањето на воениот рок знаат само генерациите кои се сведоци на тоа време.
Фото: Испраќање во војска на Железничката станица во Гевгелија, 50-те години од 20-от век - фотографија направена од Коста Аризанов
