Здружението на граѓани на лица со пулмонална хипертензија „Момент плус“ од Гевгелија во соработка со општините од регионот и Атлетскиот клуб „7-ми Ноември“ организираат хуманитарна трка посветена за лицата со ова ретко заболување, со пораката: „За здив, за лек, за надеж за пациентите со Пулмонална Хипертензија. Секој заслужува подобар живот“, порачуваат организаторите.

Трката ќе се изведува низ територијата на три општини од регионот. Ќе започне од Валандово, ќе продолжи низ Богданци, преку населените места Стојаково и Богородица и ќе заврши со пристигнвање на тркачите во Гевгелија. Целата траса е долга 35 километри. Стартот е закажан на 1 декември (недела) во 10:00 часот во Валандово, до 12:30 се очекува да пристигнат во Богданци, а кон 14 часот да пристигнат на целта во Гевгелија.

Ова е втора хуманитарна трка во Гевгелија организирана од „Момент плус“ со цел да се укаже на потребата од навремена дијагностика и лекарски третман за сите заболени од оваа ретка но опака болест, за која терапискиот третман е особено скап.
Учесниците, тркачи, се ултра маратонци од Македонија, а меѓу нив и редовната поддржувачка на сите трки Валентина од Богданци и тркачи од новоформираниот Атлетски клуб „7-ми Ноември“ Гевгелија.

Покровители на трката „Додека дишам сенадевам“ се општините Гевгелија, Богданци и Валандово, како помагатели се јавуваат „Синотип“ и хотел „Скај“, а медицинската подршка е на „Ројал Медика“.

Организаторите на трката „Dum Spiro Spero* (Додека Дишам Се Надевам) очекуваат гевгеличани да ги дочекат тркачите кои треба да пристигнат во недела околу 14 часот на градскиот плоштад и на таков начин да ја дадат својата поддршка кон хуманитарната спортска манифестација за видливост на проблемот на болните со Пулмонална хипертензија.