Светски познатиот композитор на филмска музика и добитник на Оскар, Eнио Мориконе,, почина на 91-годишна возраст. Починал рано утрово во болница во Рим, откако минатата седмица паднал и ја скршил ногата, соопшти неговиот адвокат Џорџо Асума.

Мориконе е светски познат композитор кој стои зад препознатливите нумери од филмовите „Добриот, лошиот и грдиот“ од 1966 и „Беше еднаш, на дивиот Запад“, од 1968 година.

Атмосферата на прогонување и тензија, без дијалог, во шпагети вестерн филмовите на Серџо Леоне, Енио Мориконе ја боеше со музика.

НЕ ГИ ОПИШУВАМ СЛИКИТЕ СО МОЈАТА МУЗИКА. КОГА ИМА ВАЖЕН ФИЛМ, КЛУЧНО Е МУЗИКАТА ДА КАЖЕ ШТО НЕ Е КАЖАНО, А ШТО НЕ, МОЖЕ ДА СЕ ВИДИ, ВЕЛЕШЕ МОРИКОНЕ.

Тој компонираше музика за повеќе од 500 филмови, од кои 7 се во соработка со режисерот Леоне, со кого се запознаа како деца, во основно училиште.

Роден во Рим, Мориконе до крајот на живот беше негов жител. Кариерата ја започна како трубач, а освои Оскар во 2015 година за музиката во филмот „Осуммината омразени“, во режија на Квентин Тарантино. Номинации за истата награда добија и неговите рани композиции, од 70 до 90- тите години, за филмовите „Денови на небото“ на Теренс Малик , „Мисија“ на Роланд Џоф, „Недопирливи“ на Брајан Де Палма, „Багзи“, на Бари Левинсон и „Малена“ на Џузепе Торнаторе.

Познат како „Маестро“, тој доби почесен Оскар во 2007 година, за неговите различни придонеси во уметноста на филмската музика“, а освои и 11 највисоки италијански награди „Давид ди Донатело“. Композиторот Енио Мориконе диригираше и го отвори фестивалот „Охридско лето“ 2009 година, од каде изразуваат жалење за неговата смрт и благодароност за придонесот кон фестивалот.

На барање на Мориконе, тој ќе биде погребан во кругот на семејството.

Данскиот национален симфониски оркестар со изведба на извонредната и незаборавна негова композиција од легендарниот филм „Добриот, лошиот и грдиот“.