Од денеска целосно се отвораат сите гранични премини во државата со што македонските државјани и странците ќе можат непречено да се движат без обврска за ПЦР-тест и државен карантин.
Одлуката ја донесе Владата во вторникот врз основа на препораките на Комисијата за заразни болести. Владата на истата седница донесе одлука од 1 јули да бидат отворени за сообраќај и Меѓународниот аеродром Скопје и Аеродромот „Св. Апостол Павле“ во Охрид.

Од утрово до пладне границата на влез во Македонија ја преминале повеќе од 4.200 граѓани претежно македонски државјани повратници од странство, а од странските доминираат српските државјани.
Сепак, границата со грција „Евзони“ остана затворена за македонците. Република Грција објави дека ќе ги почитува одлуките на ЕУ, границите да се отворат на 1 јули. Имено за патување во земјите членки на ЕУ важат насокоите дадени од ЕК за отворање на границите од 1 јули, годинава. Оваа одлука членките на Унијата деновиве треба повторно да ја разгледаат поради растот на бројот на заболени од коронавирусот во земјите во регионов.

Грција, според најавите на властите во Атина, засега останува на основниот план за отворање на границите на 1 јули, но и со укажување дека тоа е „план што континуирано се ажурира и во соработка со европските власти“.
Сите патници кои денеска се упатија на ГП „Богородица“ беа пропуштени од македонските гранични служби, но граничните служби на Република Грција веднаш ги вратија назад. Одмор и викенд во Грција за македонските граѓани засега е невозможен. Останатите мора да влезат од граничен премин од земја членка на ЕУ, според барањата на грчките власти.