ЦО на СДСМ го прифати договорот за состав на Влада со партијата ДУИ, објави вечерва на прес конференција мандатарот за состав на влада лидерот на СДСМ и коалицијата „Можеме“ Зоран Заев.

Обезбеден е договор за коалицирање со ДУИ и со тоа парламентарно мнозинство, рече Заев на прес конференцијата. Тој рече дека главен погон ќе биде ставен на економскиот стандард, зголемување на платите и пензиите, како и странските инвестиции. Предност ќе имаат инвестициите во здравството заради борба со корона епидемијата, како во опрема, така и во капитал.

Тој посочи дека од досегашните 26 министерски позиции, владата ќе има само 19 министерства, што значи кратење на 7 министерства од претходната влада. СДСМ од овој пакет на 19 министерства ќе превземе да раководи 11 министерства. Од нив 8 се ресорни министерства и овде односот на половите е 50%-50% со рамноправна застапеност помеѓу министри мажи и министерки жени.

Централниот одбор на СДСМ вечерва донесе и одлука за тоа кои членови на СДСМ ќе ги предводат министерствата, тоа се:
- Љупчо Николовски - Потпретседател на Влада за борба против корупција;
- Никола Димитров - Потпретседател на Влада за европски прашања;
- Фатмир Битиќи – Потпретседател на Влада за економсни прашања
- Оливер Спасовски - Министерство за внатрешни работи,
- Радмила Шекеринска - Министерство за одбрана,
- Венко Филипче – Министерство за здравство
- Бојан Маричиќ - Министерство за правда,
- Мила Царовска - Министерство за образование,
- Благој Бочварски (актуелен градоначалник на Штип) - се сели на чело на Министерството за транспорт и врски,
- Ирена Стефоска – Министерство за култура
- Пратеничката Јагода Шахпаска - Министерство за труд и социјала.

Две од министерствата ќе им припаднат на коалиционите партнери: Министерство за земјоделство ќе го раководи кадар на БЕСА, а Министерството за локална самоуправа останува и понатаму да го раководи кадар од ЛДП.