Со почетокот на уредувањето на тротоарите од двете страни на улицата „Миле Пецанов“ во Гевгелија беше најавено дека покрај поставувањето на бекатон плочки ќе биде планиран простор и за садење на дрвца. Неделава новиот дрворед веќе е засаден и гордо се издига во просторот.

Уредувањето на тротоарите на улица „Миле Пецанов“ започна кон средината на месец јануари, најпрво со поставување систем „капка по капка“ потребен за одржување на новиот дрворед. Потоа се продолжи со поставување на бекатон плочки. Се работи за површина од 1.000 метри квадратни. Засега се привршуваат работите на тротоарот од северната страна на улицата, а напоредно се поткопува подлогата за уредување на тротоарите на јужната страна од улицата „Миле Пецанов“. Ова е поточно улица која поминува покрај Градскиот пазар, во населбата Караорман. Големата фреквентност на посетители за време на пазарните денови ја прави улицата прометна и актуелна потребата од простор за пешаците.

Проектот се изведува веќе пет недели, што значи е веќе започната градежна постапка, со спроведена тендерска процедура за избор на најповолен изведувач. Тоа не ја ограничува работата на инвеститорот, Општина Гевгелија да продолжи со градежните работи на веќе започнати проекти, иако се наоѓаме во период на закажани предвремени парламентарни избори. Според упатството на ДКСК Општините и државните институции во овој период на предизборни подготовки и за време на изборните активности треба да се воздржат од вработување и распишување нови тендерски постапки.

Само јануарските градежни зафати на општина Гевгелија во рамките на програмата за комунално уредување, донесена од Советот на општината, се во вредност 373.742 евра.