Меѓународниот моментарен фонд одобри финансиска поддршка за Македонија во висина од околу 176 милиони евра за ублажување на последиците во економијата предизвикани од пандемијата со Ковид-19.

„Ова е двојно повеќе од сумата која ја очекувавме првично и навистина е добра вест бидејќи ова се поволни средства со ниска каматна стапка од 1,5 проценти и рок на отплата од 5 години. Оваа помош од ММФ ќе помогне во финансирањето на мерките за здравствена и макроекономска стабилизација и исполнувањето на потребите на билансот на плаќање кои произлегуваат од појавата на Ковид-19“, вели министерката за финансии Нина Ангеловска.

Како и поголем дел од економиите во глобални рамки, и македонската економија привремено ќе биде погодена од појавата на новата вирусна инфекција. Ефектите ќе се почувствуваат и преку намалувањето на глобалната побарувачка, но и преку прилагодување на домашната побарувачка, во услови на неизвесност и преземени мерки за ограничување на ширењето на вирусот.

„Оваа финансиска поддршка за нас е од исклучително значење, како за спроведување на фискалните мерки, така и за обезбедување на натамошен раст на девизниот потенцијал на нашата економија, односно за зголемување на нивото на девизни резерви“, истакна Анита Ангеловска Бежоска.

Од Народната Банка велат дека во рамки на комуникацијата со ММФ се потенцира посветеноста на носителите на политиките за одржување на макроекономската и финансиската стабилност, и за зголемување на потенцијалот за одржлив долгорочен раст на македонската економија. Укажано е на потребата банките и понатаму да обезбедуваат финансиска поддршка на економијата, во претстојниот период, заради што е неопходно својата капитална позиција и ликвидноста да ги одржуваат на адекватно ниво.