Петар Јанчев од советничката листа на СДСМ и коалиционите партнери денеска доби верификација на мандат како нов член на Советот на општина Гевгелија. Тој има дипломирано„Македонска книжевност и јужнословенски книжевности“ на Универзитетот „Св. Кирил и Методиј“ Филолошки Факуптет „Блаже Конески“ во 2016, а од оваа учебна година е наставник по македонски јазик во ООУ „Владо Кантарџиев“ во Гевгелија.

Јанчев за себе вели дека е актер аматер, поет и се занимава со пишување. Како член во општинскиот совет го интересираат темите од областа на образованието, културата и воопшто неговиот придонес за потребите на граѓаните за заедничките теми за кое е надлежна локалната самоуправа.

Тој денеска по верификацијата на мандатот и одобрувањето од ДИК и ОИК седна на советничкото столче меѓу своите колеги советници.

Петар доаѓа како 14-ти од кандидационата листа на СДСМ и коалиционите партнери за време на локалните избори од 2017. По оставката на досегашниот претседател на Советот (согласно член 46 од Законот за локална самоуправа) Дојчинов, тој доаѓа како дополнување на испразнетото место од освоените 10 на СДСМ и коалиционите партнери од последните локални избори.

На денешната 31 редовна седница на Советот на општината се избра и нов претседател на Советот. Честа му припадна на Тодор Ристо, исто од редовите на мнозинството (СДСМ). Ристов е дипломиран правник со повеќегодишен работен стаж во Агенцијата за вработување во Гевгелија, како и досегашен координатор на советничката група на СДСМ.

Пред изборот на нов претседател на Советот со седницата претседаваше најстариот советник Магдалена Делковска. По изборот на нов претседател на Советот со седницата после третата точка претседаваше новоизбраниот претседател Ристов, донесувајќи заедно со советничкиот состав повеќе одлуки кои беа на дневен ред на денешната редовна и изборна 31 седница на гевгелискиот Совет.