Јавното обвинителство објави соопштение за уште две потенцијално заразени лица, кои своеволно излегле од изолација, а се однесува за граѓани од Валандово. 

Надлежен јавен обвинител од Основното јавно обвинителство – Гевгелија кој е надлежен и за подрачјето и на општина Валандово, денеска до Основниот суд – Гевгелија достави Предлог за издавање на казнен налог против две лица за сторено кривично дело Непостапување според прописите за време на пандемија предвидено и казниво по член 206 од Кривичниот законик.

Во предлогот обвинителството бара лицата да се прогласат за виновни и да им биде изречена парична казна во висина од по 100 дневни глоби или вкупна вредност од 123.000,00 денари за двете лица.

Обвинетите на 13 овој месец со авионски лет допатувале од Германија, земја со висок ризик на зараза, на Меѓународниот аеродром во Скопје. Покрај упатството со кое им било укажано за задолжителна самоизолација во траење од 14 дена, тие не постапиле по Одлуката на Владата за мерки за спречување на внесување и ширење на коронавирус. Во критичниот период од 14.03.2020 – 17.03.2020 година контактирале со повеќе лица, дури и биле во Отсекот за управни работи во Валандово. Со овие дејствија обвинетите го сториле кривичното дело што им се става на товар“, стпи во Соопштението од ОЈО.

Законот предвидува санкции по член 205 и 206 кои се однесуваат за кривично дело загрозување на јавното здравје, со најстрога мерка и до три години затвор.

Вчера со 50 дневни глоби за истото кривично дело, беше поднесен предлог до Основниот суд Кавадарци за лице од Росоман кое ја напуштило самоизолацијата и заминало на утовар на стока во Струмица.
Во текот на денот Основното јавно обвинителство Гостивар во Основниот суд Гостивар поднесе Предлог за издавање казнен налог против едно лице, 58 -годишен жител на с. Добридол,   обвинет дека сторил кривично дело – Непостапување според здравствени прописи за време на епидемија од член 206 став 1 од Кривичниот законик.