Додека тече полицискиот час во Гевгелија и во целата држава, ја известуваме јавноста дека сторителот на синоќешното дивеење е идентификуван од страна на ОВР Гевгелија и истиот бидејќи е констатирано дека е лице со нарушено ментално здравје, денеска попладе е хоспитализиран во Психијатриската Болница Негорци.

Лицето е долгогодишен пациент на оваа Јавна здравствена установа (повеќе од две децении, со прекини) кое по подобрувањето на состојбата во повеќе наврати е пуштан на домашно лекување и редовна посета на дневниот центар за ментално здравје како мерка за хуман однос и социјализација на таквите болни.

Дежурниот д-р специјалист психијатар при ЈЗУ „Психијатриска Болница Негорци“ од Негорци го примил болниот во 12:55 часот денеска и издадена му е соодветна терапија. За мотивот на синоќешниот инцидент се претпоставува дека е немарност, не редовно примање на лекарствата кои за него се од траен карактер, велат од Болницата. Инаку, ова е прв ваков инцидент од страна на сторителот, (болното лице), познат по својата мирољубивост и дружељубивост со гевгеличани.

Бидејќи настанот, кршењето и оштетувањето на јавно и приватно добро во центарот на Гевгелија за време на периодот додека траеше забраната за движење (т.н. полициски час) содржи два прекршока: непридржувањето на полицискиот час и оштетувањето на материјални добра, ОВР Гевгелија против сторителот ќе подготви соодветни поднесоци до надлежните органи.

За тежината на делото ќе се произнесе полицијата, а за тежината на здравствената состојба на сторителот докторите специјалисти. Доколку се утврди прекршочна одговорност можно е лицето да добие казнена мерка „задолжително психијатриско лекување“ во специјализирана здравствена установа во траење од неколку месеци, или година/и, а доколку се утврди кривична одговорност можно е таквата мерка на лекување да биде изречена за доживотен третман.

Во текот на наредните денови специјалистите психијатри ќе ја утврдат неговата здравствена состојба, а ОВР Гевгелија степенот на одговорност по кој ќе бара од надлежните органи соодветна постапка.

Ова известување од GevgelijaNET е со цел да ја оставиме Гевгелија вечерва мирна, да ги почитуваме мерките за забрана на движење, да се осврнеме на своите дома во семејството и заедно да ја надминеме оваа корона „психоза“ која речиси еден месец ја оптоварува државата, а повеќе од три месеци светот. Разговарајте со своите дома, внесете ведрина, намалете ја напнатоста меѓу себе зошто секој стрес носи влошување на општото здравје и нашиот имунитет.

Пријатна ноќ во третиот вечерен полициски час. Седете мирно дома со своите.