Со вчерашното пуштање во употреба на новата мерна станица за квалитетот на воздухот во подрачјето на Гевгелија, денеска нашиот град осамна на МК картата при Министерството за животна средина каде се изразуваат дневните параметри на измерени податоци присутни во воздухот што го дишеме над Гевгелија.

Податоците за денеска се во „зелената зона“ што значи чист незагаден воздух.

Првиот измерен параметар е присуството на PM25 честичките со концентрација од 11,74 mg/m3.
Податоци кои се алармантни е во случај на надминување на прагот на информирање за суспендирани честички со големина до 10 микрометри PM10 и тоа ако податоците се јавуваат во висока концентрација два последователни дена со среднодневни концентрации над 100 mg/m3.

Вакви мерни станици освен најновата отворена во Гевгелија со средства на Европската Унија, има поставено и во Скопје, Битола, Велес, Кавадарци, Тетово, Национален парк Маврово, Кичево, Лазарополе, Кочани и Струмица.
Од сите податоци земени денеска во 15:00 часот само Битола е во средно ниска зона на загадување (жолт маркер) со присуство на PM25 честичките со концентрација од 11,66 mg/m3. (Ова е пониска концентрација од онаа измерена во Гевгелија и зелената боја за нашата Општина /н.з.)

Општината денеска информираше дека овој проект вреден 470.000 евра е обезбеден со грант на Европската Унија во соработка со партнерска општина од Република Грција преку програмта за меѓународна соработка која ја финансира ЕУ.

Имаку, Покрај набавката на мониторинг станицата, во рамките на проектот се спроведуваат и низа други активности. Имено во рамките на оваа програма е направена комплетна замена на сите инструменти и во мерната станица Битола 1, и се набавени и инструменти за мерења на ПМ 2,5 честичките и тоа за мерната станица Битола 1 и за оваа во Гевгелија. Исто така, набавени се два автоматски стандардни/референтни ниско волуменски семплери за мерење на суспендирани честички (Пм10 и ПМ 2,5) и истите се поставени во близина на мерните станици Битола 1 и Гевгелија. Дополнително во рамки на проектот ќе се направи проценка на влијанието на квалитетот на воздухот врз здравјето на луѓето во прекуграничниот регион, ќе се развие здравствен индекс, ќе се зајакне прекуграничната соработка преку организирање на тематски обуки, ќе се подготват и спроведат повеќе активности за подигнување на јавна свест на граѓаните. Планираните активностите од проектот целосно се очекува да се завршат до август 2021 година, информираат од Министерството за животна средина.

Значи, целата финансиска конструкција на проектот не е искористена само со поставувањето на мониторинг станицата за квалитет на воздухот во Гевгелија, туку и набавка на друга опрема, тематски обуки за подигање на јавната свест кај граѓаните за потребата од чист воздух во средината во која живееме.

Граѓаните на општина Гевгелија од денеска можат самостојно да ја следат состојбата за квалитетот на воздухот во градот на официјалната веб-страна на Министерството за животна средина и просторно планирање, на следниов линк: http://air.moepp.gov.mk/.