Жителите на Прдејци конечно ќе добијат функционален Дом на културата со средства кои ги одобри Владата на РСМ. Ова решение за населеното место со 100 куќи и нешто повеќе семејства произлезе од одлуката на Владата за пренамена на средствата за изградба на карго аеродром во Штип во проекти потребни во локалните средини.

Одлучено е планираната инвестиција на ТАВ Македонија, за изградба на аеродром во Штип, да не се реализира, а средствата ќе бидат пренасочени за животната средина, најави пред почетокот на четвртиот квартал од годината првиот вицепремиер на Владата на РСМ.
Изградбата на карго аеродромот требаше да чини 60 милиони евра, идеја стара десет години и најавена за време на претходната влада на ВМРО-ДПМНЕ. За таа цел, земјоделците останаа без најплодните ниви во Овчеполието – 500 хектари почва меѓу Ерџелија и Мустафино.
Деновиве, на 29-та седница на Владата, одржана на 12 декември, донесена е одлука за пренамена на 35 милиони евра од средствата предвидени за изградба на карго аеродромот за реализација на локални проекти во општините ширум државата. Со средствата се опфатени 99 проекти кои треба да се реализираат во 75 општини.

Во одобрените проекти е опфатена и општина Гевгелија, со проектот за реконструкција на Културниот дом во с. Прдејци.
Жителите на ова населено место со години и децении бараат реконструкција на овој објект, започнат со средства од тамошните жители, но никако да ја финишира својата функционална намена. Со последната одлука на Владата за реконструкција на објектот одобрени се 10.220.420 денари, средства обезбедени од Буџетот на РСМ.

Од општината вечат дека веќе е изработен основен проект со кои аплицирале за одвојување средства за оваа намена пред телата на Владата. Објектот ќе располага со повеќе наменска сала, изложбен простор и придружни простории.

Наместо авиони над Ерџелија, Прдејци ќе добие културен дом.