Неформалната граѓанска група МДМ организира хуманитарна акција за донирање новогодишни пакетчиња наменети за децата без родители, за децата со посебни потреби, за децата во семејства од ранливите категории, за болните деца згрижени во здравствените установи.
- „Ништо не ја полни душата како искрена и среќна детска насмевка“, велат од МДМ и порачуваат:
- „Домаќини, празници се ближат. Кога ќе купувате паќетче за своето дете кој може нека купи едно повеќе (за донирање), или симболично поклонче. Идејата е пред Новогодишните празници да ги поделиме на дечињата од ранливите категории“.

Акцијата започна од крајот на ноември и веќе е во тек полни три недели. За овој период собрани се над 1.000 пакетчиња, од кои 110 се донации од хумани гевгеличани.

Неформалната граѓанска група има свој претставник во Гевгелија кој вели дека иако акцијата има републички карактер нема да биде заобиколена ниту Гевгелија, како со донирања од страна на хумани граѓани, поединци, така и организирано врачување на подароците на деца од нашата заедница.

- „Планираме акцијата да се омасови со наближувањето на празниците и со ширењето на пораката преку социјалните мрежи. Всушност, и неформалната граѓанска група МДМ произлезе од група на социјалните мрежи каде се најдоа приврзаници на акцијата и кандидати за нејзино спроведување. Кај нас секој што сака да донира отворени се просториите на „Пионерскиот дом“ во Гевгелија за превземање на донациите во термин од 09:00 до 16:00 часот. Идејата е секое дете од Центарот „Мајка Тереза“, од Центарот за згрижување на деца со посебни потреби, од децата кои живеат во семејства од социјален ризик, болните деца во здравствените установи, сите да добијат паќетче за Нова Година. Доколку некој сака да подари и други поклони, како играчки, украсни новогодишни декорации за децата да го разубават амбиентот каде престојуваат, истите ќе бидат прифатени и донирани“, вели за GevgelijaNET координаторот на акцијата за Гевгелија и регионот, Ризо Јованов.

МДМ (кратенка од Машки домаќински муабети) до сега брои 28.000 чланови. Ова е нивна прва хуманитарна акција. Планираат секој месец да се организираат разни акции за споделување на граѓанска грижа и хуманост.

Сега, домаќини, може и домаќинки и општествено одговорни млади лица, на Вас е да се потрудите да се приклучите за акцијата за среќна насмевка на децата од нашата средина. Донирајте и не чекајте пофалби. Само исполнето срце дека сте поклониле грст среќа кај најмалите од нашата заедница.