И Црквата се приклони на препораките на здравствените авторитети во однос на мерките за спречување на ширењето на коронавирусот.

Почитување на заштитните мерки при посетата на црковните храмови остануваат да важат, но и новите препораки за избегнување на групно чествување на претстојните празници. Ова во согласност со новата кризна состојба во однос на корона предизвикот и забраната за организирање на групни, масовни празнични собирања во верските храмови, според мерките донесени од Владата по препорака на Комисијата за заразни болести при Министерството за здравство.

Тоа значи нема коледарски огнови и маалски собирања, нема богојавленски фрлања по крстот во Вардар, нема масовни чествувања на верските календарски празници кои претстојат.

Во согласност со препораките од Општинскиот кризен штаб Гевгелиското Архиерејско намесништво апелира до граѓаните на општина Гевгелија божиќните и богојавленските празници да се прославуваат со одговорност. Ограничувањата за јавни собири ќе се почитуваат и од страна на црквата.
При посетата на верските храмови Од Гевгелиското Архиерејско намесништво препорачуваат верниците да ги почитуваат мерките за заштита од КОВИД-19, носење маска и одржување на потребната физичка дистанца. Тоа важи како при посетата на божјите храмови, така и при присуството на празничните литургии.
Според насоките од МПЦ, оваа година богојавленското осветување на водите ќе се одржи во кругот на црковните објекти.
- „Запазувајќи ги овие мерки, како Црква ќе придонесеме за зачувување на општото здравје на нашиот народ, во овие тешки времиња кога целиот свет е исправен пред предизвикот да се избори против опасниот вирус, истакнуваат од САС на МПЦ-ОА.

Празнувањата годинава ги диктира пандемијата. За таа да не продолжи да го диктира нашиот живот редно е да се почитуваат мерките за негрупирања, избегнување на масовни собири, а во подршка на јавното здравје се приклучуваат и гевгелиските цркви.