Општинската пописна комисија за пописниот реон 11 кој ги опфаќа општините Гевгелија и Дојран вчера ги подели пописните материјали на сите регистрирани попишувачи.

На сончев ден на отворено во дворот пред седиштето на Општинската пописна Комисија, кое се наоѓа на улица „Борис Карпузов“, позади зградата на поранешен Извршен Совет, вчера претпладне беа поделени компјутери-лап топ на сите попишувачи во Пописен реон 11 кој е сочинет од територијата на општините Гевгелија и Дојран..

Над 100-на наши сограѓани заедно со реонските инструктори и државните инструктори кои веќе неколку дена ги спроведуваат организационите подготовки за Попис 2021 во нашиот крај, утре понеделник стартуваат со едукација на попишувачите кои ќе бидат директни изведувачите на пописот меѓу домаќинствата во Гевгелија и Дојран. Претходно, неделава беше изведена тродневна обука за методологијата на попишувањето на која зедоа учество назначените реонски инструктори, а ја спроведоа овластени државни инструктори, вработени во Државниот Завод за статистика на РСМ.

Целиот процес на настава и делење на попишувачките материјали беше спроведен со доследна примена на заштитните мерки против ширењето на ковид-19.

Пописот на населението, домаќинствата и становите во 2021 година се изведува без хартиени податоци, по електронски пат со користење на унифициран систем за евидентирање на податоците прибрани на терен, преку програма која ја користат сите над 6.000 учесници во ПОПИС 2021 во Македонија.

По тридневната обука на попишувачите кои се финални изведувачи на пописот во комуникација со граѓаните, посетувајќи ја секоја адресна единица која е живеалиште на семејство, или поединец, пописот ќе стартува во четврток на 1 април 2021, со почеток во 8:00 часот.