Twitter

Утрово на Инфективната клиника од коронавирусот почина нашиот познат музичар, композитор и тв водител Драган Вучиќ. Тој беше хоспитализиран на Инфективната Клиника во Скопје пред осум дена откако состојбата му се влошила и од тогаш е лекуван на одделението за интензивна нега. И покрај сите напори на лекарите и целиот стручен тим, Вучиќ со многу тежок наод на белите дробови, за жал, му подлегнал на вирусот. Упатувам искрено сочуство до семејството и блиските, објави на фејсбук министерот за здравство Венко Филипче.

Драган Вучиќ е роден во 1955 година и беше среќно оженет веќе четири децении. Неговата сопруга Весна е ќерка на легендарниот гајдаџија Пеце Атанасоски, додека син му Мартин е пејач и директор на Ансамблот за народни песни и ора „Танец“.

Тој беше композитор, музичар, пејач, бас гитарист, водител на познати телевизиски проекти, првиот беше „Вашите 5 минути“, а последниот телевизиски проект, се' уште присутен на програмската понуда беа неговите „Гурмански муабети“. Но, не само емисиите со кои многу генерации израснаа, Драган остави и голем белег во македонската музичката поп и фолк сцена.
„Каде и да одам“, „Твојте очи шараат“, „Ника, Ника, Марика“, „Кате мори Кате“ и многу други композиции се само дел од неговиот музички опус.

Драган Вучиќ важна улога има и како композитор на неколку македонски песни, а една од нив е легендарната „Свирете ја зајди зајди“, како и „Кажи ѕвездо“.