Twitter

Браќата Бранко и Влатко Сапламаеви од Богданци - со уметничко име „SAP Brothers“ во саботата го промовираа својот видео-музички првенец „Љубов си ти“ кој веќе си најде публика и одобрување од преку 13 илјади прегледи за два дена.

Во рустикална атмосфера, снимено во амбиентот на локалниот планински убавец Кожуф, со нивниот миленик кучето Арон, браќата пеат за пополнетата љубов и доверба од четириножниот човеков пријател.

Музиката е авторско дело на „SAP Brothers“, режија, снимање, монтажа и аудио продукција на Ѓорги Вацев. Солистичка поддршка на гитара имаат од Горан Алич, а пратечки вокал е нивната сограѓанка Василка Ќортошева.

Топли јужни звуци за опуштање од веселата екипа на млади соработници од југот, од Богданци.
- „Прекрасно е чувството кога имаш некој до тебе кој секој можен момент го претвара во среќа. Среќни сме што те имаме АРОН! Љубов си ти!“ - објавија „SAP Brothers“ со промвирањето на своето видео на социјалните мрежи.

- „Ова е наша приказна, но мора да признаеме дека си земаме уметничка слобода за да ја раскажеме на поинаков начин. Ние се фокусираме на музиката, љубовта, имагинацијата и смеата и затоа го направивме тоа. За забава и задоволство наше и ваше“, порачува Влатко Сапламаев.
Повозрасниот член Бранко пак вели: - „Единствено нешто што го сакаме во моментот е на спонтан и ненаметлив начин да ги отргнеме мислите на публиката од секојдневието и да ве поканиме во еден поинаков и барем за нас интересен и забавен свет“, веројатно мисли на музиката, опуштениот планински амбиент на Кожуф и несебичната посветена грижа и друштвеност на човековиот пријател, кој е дел од нивното семејство, песот Арон, а можете и вие да размислите за своја замена на некој Арон.

Спотот веќе се врти и на домашните радио фреквенции, а браќата Сапламаеви најавија продолжение на нивните музички-видео проекти.