Советот на општина Гевгелија денеска ќе ја одржи својата 21-ва редовна седница на која ќе бидат разгледани Буџетот на општината за 2023 година, програмите кои се составен дел од буџетот како и финансиските планови на општинските училишта за следната година.
Меѓу предложените програми се издвојува и таа за медиумска транспарентност на Општината. За нејзино реализирање во текот на 2023 година се планирани средства во износ од 1.500.000 денари.
Највисока ставка во неа се Трошоци за снимање и емитување на седниците на Советот на општина Гевгелија во вредност од 1.100.000 денари.
За истата намена во 2022 година на реализаторот на таа услуга „НОВА К-12“ ДООЕЛ ГЕВГЕЛИЈА потрошени се 660.000 денари, со месечен паушал од 55.000 денари.
Следејќи ја актуелноста на медиумската транспарентност со која се фали општината дека е на високи 92% погледнавме во популарноста и гледаноста на седниците на Советот во текот на изминатите месеци.
Од реализираните 20 работни седници и една свечена седница по повод Општинскиот празник 7-ми Ноември вкупниот број на Ју-Тјуб гледачи на постираните снимки од седниците објавени на општинсата ВЕБ страница изнесува 1.468 посетители. Тоа значи дека во просек една седница имала 69,9 посетители, или заокружено вкупни по 70 лица ги „гледале“ секоја од снимката од седницата на Советот.
Ваквата поразителна НЕ популарност на снимките од седниците на Советот со ништо не можат да ја оправдат намерата на предлагачот на програмата за Медиумска транспарентност за 2023 година ставката „Снимање на седници на советот“ од 660.000 денари да ја покачи на 1.100.000 денари. Предлагач на сите програми е Градоначалникот на општина Гевгелија.
Од кои параметри предлагачот на точката за транспарентност констатирал дека истата треба да се зголеми за речиси 70% повеќе? Троши ли повеќе струја снимателот во просторот кој е јавен објект (салата на Народниот театар, значи струјата ја плаќа јавната установа) троши ли повеќе гориво? Струјата и горивата се основните енергенси кои ја диктираат светската економска криза годинава, а тоа не се основни трошоци на снимателот во јавниот објект.
Кој си вади суми од ракав за приграбување од локалниот Буџет во година кога ја броиме секоја сијалица која непотребно свети и троши скапо платена струја?
Какви зголемени производни трошоци има реализаторот на услугата „Снимање на седници на Совет“ и кој ги измерил, за да се предложи така галантно толку зголемена ставка во локалната програма за транспарентност?
Да потсетиме, средствата од локалниот буџет им припаѓаат на сите граѓани, тоа се јавни средства и подлежат на јавна одговорност и критика за нивното несовесно трошење.
Оваа милионска сума за медиумска транспарентност пак според Законот за јавни набавки подлежи на Јавна тендерска постапка за избор на најповолен изведувач на услугата, а не на избор според наклонетост.
Статистиката вели дека – Во 2022 година едно гледање на снимка на седница, Општината ја чини во просек 450,- денари. Во 2023 според планираното едно гледање на снимка за општината ќе биде трошок од 750,- денари. Тоа е речиси колку дневницата на просечно платен работник.
Вреди ли толку оваа преплатена транспарентност за 70 гледачи во месецот?
Медиумскиот пазар во Гевгелија одамна не постои, па оваа транспарентност се претвори во капитализиран монополски „послужувач“ од страна на Општината.
Фото во прилог:
Принт скрин од You-Tube објавите на седниците на Советот каде се гледа дека имаат од 6 до 38 прегледи за време од 1 до 3 месеци од постирањето на снимките
Последно држаната 20-та седница на гевгелискиот Совет има само 8 прегледи, а 17-а свечена седница по повод 7-ми Ноември има поразителни 6 прегледи за скоро два месеци.
18-та одржана седноца има 20 прегледи од граѓаните за еден ипол месец, а 19-та седница има 38 прегледувања на снимката.
