Ладниот воздушен бран кој доаѓа од северните делови на Европа пристигна и во Македонија и донесе снег и снежни наноси во повисоките места во државата, а судирот на ладниот бран и топлата воздушна маса кај нас во Гевгелија донесе ветер со брзина и над 70 километри на час.
Не беа сите подготвени за зимското изненадување.
Во текот на вчерашниот ден во Македонија беа изведени две успешни акции на полициски службеници за спасување на лица. Интервенирано е во Крушевско кај месноста „Слива“ и на Попова шапка.
На 04.02.2023 во 16:23 часот во СВР Битола, К.Р.(22) од Скопје побарал помош затоа што заедно со неговата сопруга на патот од споменикот „Слива“ кон Крушевското езеро, со патничко возило „дачиа“ со скопски регистарски ознаки заглавиле во снежни наноси. Полициски службеници од Полициското одделение за безбедност на патниот сообраќај Крушево извршиле проверки на теренот и во 16. 35 часот на место викано „Тушот“ лицата биле пронајдени во добра здравствена состојба, а возилото било извлечено.
На 04.02.2023 во 15.35 часот во СВР Тетово било пријавено дека две малолетни лица од Скопје се наоѓале во објект кај ски-лифтот на Попова Шапка и поради густата магла и силен ветер не биле во можност да слезат. Полициски службеници од Полициското одделение Попова Шапка во содејство со Ратрак излегле на местото и околу 16.20 часот малолетниците биле пронајдени, прифатени и доведени до центарот на локалитетот во добра здраствена состојба.