Македонските тимови на Дирекцијата за заштита и спасување успеале да извлечат 38-годишна жена под урнатините во Турција, соопштија доцна попладнево од ДЗС.
Жената била спасена од под урнатините на зграда во градот Адијаман во Турција во петокот, петтиот ден од страотниот земјотрес во Турција. Оваа успешна спасувачка акција предизвика овации од присутните околу теренот. 38-годишната Мелтем Унсал била 114 часа „закопана“ под бетонскиот крш од земјотресот кој предизвика уништување низ целиот регион.
Екипите внимателно ја подигнаа спасената Мелтем на носилки покрај скршени бетонски блокови и искривен метал до амбулантно возило.
Од ДЗР објавија и видео од дел од спасувачката акција.
Тимот на ДЗС ја носи спасената жена до амбулантното возило. Вечерва тие остануваат на терен, се борат со часовите за да се спасат животи на други преживеани под урнтините.
Вчера и македонскиот армиски тим кој е дел од спасувачките активности во региотните на Турција зафатени од земјотресот беа дел од успешната операција за извлекување на пет годишно дете од урнатините во градот Кахранманмараш.
Нашиот армиски тим по сознанијата дека се слушнати гласови под урнатините по што по 6-часовно расчистување на урнатините слушнале детски глас, па продолжиле заедно со турскиот тим за пребарување уште 4 часа со расчистување и успеале да го извлечат 5-годишниот Сулејман, соопшти македонското Министерство за одбрана.
Инаку, тимовите во состав од 39 обучени и опремени спасувачи пред три дена тргнаа кон Турција каде помагаат во спасување на преживеани од под урнатините по разорните земјотреси што ја погодија земјата.
Граѓаните донираат топла облека, спасувачките тимови тргнаа за Турција
Македонската влада на вонредна седница донесе одлука за испраќање на 40 обучени спасувачи со возила и опрема и 24 припадници на АРМ со две трагачки кучиња. Меѓу спасувачите има пожарникари од Струмица, Гевгелија и од Тетово, кои со возила и опрема за спасување од урнатини, тргнаа за Турција. По големиот земјотрес што ја погоди земјата во понеделникот, како и соседна Сирија, загинаа најмалку 21.000 луѓе.
