Со производство на 3.000 парчиња леб во услови кога другите пекари протестираат и не произведуваат леб по донесената одлука на Владата за замрзнување на цената на лебот на 33 денари, гевгелиската пекара „Cake&Bake“ се пушти во погон да ги задоволи потребите на граѓаните.
Лебот е основен животен артикл во исхраната на човекот и нечовечки е да го нема.
– „Денеска произведовме 3.000 парчиња леб и сите се продадоа пред 15 часот. Последната фурна со пресно испечен леб беше готова во 13 часот и лебот повторно за рекордно време беше распродаден. Граѓаните бараат уште, но току се нашите можности за денеска. За утре очекуваме да пристигне додатна работна сила, пекар од Турција кој ќе се вклучи во тимот на „Cake&Bake“ за произвдство на поголеми кличини на леб. Цената на лебот е онаа што ја одреди Владата, 33 денари за бел и полубел леб од 450 грама“ – вели за GevgelijaNET Велика Карагонова Созуер, сопственичка на пекарата.
На ваков потег пекарата „Cake&Bake“ се одлучи после еднодневната пауза на производството на леб и чувството дека интересот на граѓаните е најважен.
– „Греота е да им скусиме леб на луѓето. Во оваа криза, кога лебот е основен за да се прехранат голем број семејства, ние одлучивме дека треба да продолжиме со работа и да го продаваме белиот леб по цена од 33 денари“, вели за ДВ, Велика.
Брачниот пар Созуер со пекарскиот бизнис почнале во јуни 2021 година и отворија пекарата во Гевгелија со репрезентативна продавница за пекарски и слатки производи. Почетоците биле тешки, со многу подеми и падови, но за изминатиот период тие успеале да го одржат и да го прошират пекарскиот бизнис.
– „Некогаш се работи со добивка, некогаш со зијан, но може да се работи ако се сака. Можеби во овој период ќе работиме со загуба, но мора да се издржи и да им се помогне на овие коишто се најзагрозени“, изјави Велика.
Најчести муштерии во пекарата се пензионерите, но се почесто сопственичката вели дека гледа и сиромашни семејства, на кои треба да им се помогне, а не да им се ускрати и тоа парче леб што едвај успеваат да го обезбедат за дома.
Зголемено производство
Со цел да им се излезе во пресрет на сите граѓани кои деновиве се потешко доаѓаат до векна леб, пекарата Cake&Bake одлучи да го зголеми производството на бел леб. Тој и највеќе се троши. Ако во текот на летото се продаваат и по 3.500 бели лепчиња дневно, за интегралниот има побарувачка од 50 лебови на ден.
– „Денеска имавме зголемено производство на леб кој веднаш се троши, а слушаме најави дека од утре веќе со работа ќе почнат и други пекари“, велат од гевгелиската пекара.
На ваквиот чекор да продолжат со производство на бел леб се одлучиле откако увиделе дека други пекари во градот почнале да го продаваат лебот од 450 грама дури и за 58 денари.
– „Точно е дека имаме многу трошоци кои постојано раснат. Ние како пекара не користевме ниту субвенции од државата за струја, а сепак го поевтинивме лебот изминатиот период. Кај можат двајца пензионери да купат два леба во денот, ако нивната цена е над 100 денари?“, коментира нашата соговорничка.
Таа се надева дека сепак доаѓаат подобри времиња за пекарската индустрија. Откако ќе се надмине ситуацијата со недостигот на леб, пекарите се надеваат дека државата во иднина сепак ќе им пружи некаква помош со цел да се стимулира и поддржи оваа дејност.
