Синоќешниот натпревар помеѓу КК „Кожув“ и „Еуро Никел“ донесе многу емоции кај навивачите на домашниот тим и воопшто сите гевгеличани.
За тоа се погрижи навивачката група „Фантоми“ која ја одбележа годишнината од смртта на поранешниот кошаркар на Кожув, Иван Пенов. На шест минути пред крајот на првата четвртина, симболично, поради бројот 6 што го носеше Пенов, играта беше запрена, а во делот од трибината каде што се најзагреаните фанови на Кожув, беше истакнат голем дрес со презимето на загинатиот кошаркар.
Иван Пенов загина на 18-годишна возраст, на 20 февруари 2021 година во сообраќајна несреќа, на патниот правец Стар Дојран-Нов Дојран.
