Оштетени две возила во ноќни часови, на два различни јавни паркинг простори, но на сопственици кои се вработени и обавуваат функции во Јавна општинска установа во Гевгелија.
Од СДСМ Гевгелија денеска стигнува реакција со која се осудува овој вандалски чин препознен како „адут на неспособните, што е одлика на владеењето на политичките незнајковци“.
Се работи за возило сопственост на директорката на ЈОУДГ „Детска Радост“ Гевгелија и за возило сопственост на претседателот на Управниот одбор на истата Јавна установа во Гевгелија. Возилата се посипани со боја додека биле паркирани на јавен паркинг пред станбени згради каде живеат сопствениците на истите. Настаните се случија на 17 и 24 март годинава и истите се пријавени во Полициска станица Гевгелија.
Во својата реакција од СДСМ Гевгелија денеска објавија:
– „Политички обоеното вандалство го препознаваме по изборот на возилата на сосема различни делови од градот, чии сопственици работат во иста јавна установа врз која што Општината и градоначалникот на Гевгелија минатата година во два наврата ги изгубија ингеренциите на делување, поради незаконско постапување“.
Тие изнесоа оценка дека „Само неспособните, од незнаење немоќните, општествено не едуцираните својата неспособност ја демонстрираат со деструкции и нанесување штети. СДСМ Гевгелија најостро реагира на ваквиот политички говор на неспособните“ и додаде дека „ Со штеточини не се развива Гевгелија!“
Фото: Оштетените возила после „ноќната посета“
