Песни и ора се вијат вечерва на трет ден Велигден во Миравци во чест на традиционалната фолклорна манифестација „Ѓура Мара“ која има свои културни, но и историски вредности за жителите од овој крај.
„Ѓура Мара“ е фолклорна манифестација на настаните од пред еденипол век кои се одвиле во тогаш селото Миравци. Сведочи за убавите миравчанки, но и храбрите миравчки момчиња.
Мара била убава штотуку замомена девојка од селото и на трет ден Велигден како и сите девојчиња била на сред село да заигра оро со другарките. Овде ја бендисал турски воен намесник и им дал ишарет на своите војници да ја грабнат Мара да ја однесе со него. Спискале селаните, ама Мара ја грабнале турците. Не требало многу се кренал нејзиниот брат Ѓуро со другарите по војниците да ја спасуваат Мара. Ги стасале грабнувачите кај селската чешма. Овде во борба со турските аскери загинал братот на Мара, а таа била спасена, вратена дома кај своите.
Во сеќавање и почит на оваа храброст, решителност на младиот Ѓуро и убавата Мара, селаните секоја година на истиот ден – Трет ден Велигден своите средби и ора ги посветувале на Ѓуро и Мара.
Така настанало орото „Гура Мара“ и манифестацијата. Орото е моминско, а турски заптии гледаат од страна и се демнат да грабнат девојка. Тука се постарите соселанки на Мара кои со стапови ги демнат душманите и им се закануваат да не го кинат моминското оро.
Ова е стар обичајот на Миравци кое и по еденипол век ги собира Миравчани на средсело на Третиод ден од Велигден. Главни изведувачи на манифестацијата и организатори се КУД „Танец“ од Миравци. Манифестацијата е поддржана од Програмата за култура на општина Гевгелија за 2023 година.
