Огромно достигнување и вредно искуство е придобивката за тимот јуниори на Фудбалскиот клуб “Кожуф“ од Гевгелија, генерација 2012 од учеството на годинашниот Интернационален фудбалски куп за јуниори „Далматико 2023“ што се одржа во Сплит, Хрватска
Нашите 11 годишни фудбалски надежи ги вкрстија копачките на теренот со подмладокот на фудбалски тимови од врвен ранг со долгогодишна фудбалска историја, учествувајќи на турнир во конкуренција од 150 екипи и над 3.000 учесници.
Гевгелискиот тим беше во групата со „Ду Талент“ од Дубровник, „Спалато“ од Сплит и „Војводина“ од Нови Сад. Во дуелите со овие екипи остварија одличен резултат. Најпрво го победија „Ду Талент“ со резултат 2 : 0. Вториот натпревар го одиграа со „Спалатико“ Сплит и остварија победа со 7 : 2. Третиот натпревар го одиграаа со еден од фаворитите на турнирот, „Војводина“ од Нови Сад, и овде во првото полувреме нашите јунори одиграа рамноправно со резултат 1:1 парирајќи им во игра на моќните фаворити, но на крајот натпреварот заврши со 1 : 4 за „Војводина“ Така нашите јуниори го освоија второто место во групата и се пласираа во осминафиналето.
Осминафиналето беше ново доживување на гевгелиските мали фудбалери. Овде за прв пат играа натпревар под рефлектори, ноќен термин со почеток во 21:00 часот За противници ги имаа „Хаск“ од Загреб, еден од најстарите фудбалски клубови во Хрватска. Натпреварот заврши со резултат 0 : 0 во регуларно време. По изведувањето на пеналите среќата не им била наклонета на нашите јуниори. Но ова за нив беше ново искуство и меѓународен барометар дека можат да се соочат и со моќни имиња од фудбалот.
Тренер на овие фудбалски јуниори, непоколебливи на меѓуародните турнири е фудбалското име од југот Трајче Ников.
– „Со генерација 2011/2012 тренираме уште од најмала возраст, некои деца имаа само 5 години кога го започнаа тренинзите, што е показател дека оваа работа треба време и трпение за создавање фудбалер кој може да истрае на правиот пат кон успехот и победата“ – изјавува за GevgelijaNet тренерот Трајче Ников.
Ников е горд на досегашните успеси на јуниорите на „Кожуф“ кои што тој ги тренира:
– „Генерацијата 2012 на „Кожуф“ е две години по ред РЕГИОНАЛЕН ПРВАК на Централен регион со ниту еден изгубен натпревар и со тоа се пласиравме за учество на завршниот турнир што се одржува во Скопје на кој настапуваат сите победници на региони од Македонија. Јуниорите од „Кожуф“ се во ТОП 10 екипи од цела Македонија. Ова е доказ дека сме на прав пат во нашата спортска работа со овие млади фудбалски аматери. Останува да продолжиме и понатаму со многу работа и дисциплина и во следните наши спортски предизвици“ – вели гордо тренерот Трајче Ников.
Тој потенцираше уште три клубски успеси на јуниорите 2011/2012:
– „Генерација 2011/12 годинава учествуваше на Меѓународни турнири во Грција организирани во местата Гуменица и Поликастро. И на двата меѓународни турнира гевгелиските јуниори освоија ПРВО место. Исто така оваа генерација јуниори учествуваше и на силен Меѓународен турнир во Скопје, на „Маџари Куп 2023“ и овде го освоивме 3-то место. Со овие победи осилени од успесите заминавме на турнирот „Далматико“ во Хрватска. Се’ се тоа успешни настапи на нашите јуниори, со кои што осоколени продолжуваме понатаму“ – вели Ников, горд што успеал детската игра да ја претвори во достоен репрезент на Македонија и нашата Гевгелија на меѓународни спортски настани.
Се на се ова се многу активности за децата од овие две генерации и тука нема да застанеме. Продолжуваме поснажно, посамоуверено на теренот и тоа е правилниот пат за правилен развој на фудбалот, изјави спортскиот фудбалски стручњак и тренер Трајче Ников.
GevgelijaNET им честита на јуниорите и секако за трудот на тренерот Ников да ги доведе децата до стадиум на успех и победи на фудбалските терени.
Им посакуваме многу среќа и остварување на нивните спортски амбиции!
