Филмската уметност стана поле и за искажување на младите со пишување есеи како средношколска филмска лектира.
На конкурсот за најдобар фил(м)ософски есеј како дел од Средношколската видео лектира, сегмент од Едукативната програма на Филозофскиот филмски фестивал (ФФФ), ученикот Благоја Панов од СОУ „Јосиф Јосифовски“ од Гевгелија освои III место за најдобар средношколски филмософски есеј.
Филмот како медиум е неизоставен дел од уметноста која е така широко распространета до консументите, публиката. Новите современи трендови отворија и простор за доживување на филмската уметност како простор за искажување на секој гледач за впечатоците, сижето на филмската приказна, целта на наративот, пораката до гледачите. Ваквиот вид уметност стана и мегдан за литературно искажување на новите генерации гледачи, пред се младите.
Отука не е за чудење и интересот на нашите средношколци за учество на натпреварот за Средношколска видео лектира.
Ученикот Благоја Панов со освојувањето на Третото место на конкурсот, доби бројни награди, списанија и зборници од Филозофското друштво, книги од издавачката куќа „Аз-Буки“, филмови од Кинотеката на Македонија. Придобивка е што ученикот Панов доби како награда и едногодишна стипендија од Универзитетот „Еуропа Прима“, потоа бесплатни курсеви по шпански јазик од амбасадата на Шпанија и парична награда.
Наградите беа врачени од страна на амбасадорот на Шпанија, Хозе Луис Лозано Гарсија.
Гевгелискиот средношколец Благоја Панов искажа голема благодарност што неговиот награден труд не остана само во рамките на натпреварот и жири изборот при Филозофскиот филмки фестивал во Скопје, туку со превод на шпански јазик ќе биде достапен и за читателската и филмска публика од Шпанија и земјите од ова говорно подрачје. Оваа меѓународна дисперзија на трудот на гевгелискиот средношколец, како и на прво и второ наградените есеи, е посебен ангажман на Амбасадорот на Шпанија во Македонија, неговата екселенција Хозе Луис Лозано Гарсија.
Честитки за Благоја Панов и за вредниот посветен труд на менторката, професорката Снежана Арџанлиева Танева.
