Институтот за јавно здравје на РСМ, лабораторија Велес направи испитување на квалитетот на водата во Дојранското езеро и утврди дека истата е во одлична состојба со препорака дека може да се користи за капење и рекреаација на луѓето.
Се испитуваа примероци езерска вода земени од „Градска плажа“, плажата кај хотелот “Полин” и плажата „Гранико“ на ден 17.05.2023, а резултатите од тестирањето се завршени на 5.06.2023 година.
Оваа лабораторија е референтна и акредитирана според стандардите на МКС EN ISO/IEC 17025 :2006 за хемиско и микробиолошко тестирање на вода и храна и нејзините резултати се веродостојни. Потписници на стручниот лабораториски наод се Прримариус д-р Марија Пенова, спец. по хигиена и здрава екологија и М-р. екк. дипл. инг. металург Богданка Јорданова. Во стручниот наод од извршената анализа стои наведено следново:
– „Анализираниот примерок на вода одговара на 3-та класа со присутност на матност и амоњак, по останати испитани физичко-хемиски параметри е со 2-ра и 1-ва класа, а по однос на испитаните параметри од микробиолошката анализа е во ОДЛИЧНА СОСТОЈБА.
Напомена – Од извршените испитувања и стручната анализа се заклучува дека водата на Дојранлкото езеро на место „Градска плажа“ отстапува од бараната 2-ра класа само по матност и амоњак, параметри кои не се одразуваат по здравјето на луѓето и истата може да се користи за капење и рекреација на луѓето“ – се вели во стручниот наод.
Од локалната самоуправа во Дојран по јавното објавување на резултатите од лабораторискиот наод истакнуваат дека водата кај трите споменати плажи е во одлична состојба и не постои пречка луѓето слободно да се капат и да уживаат во рекреативни активности во водата.
Исто така градоначалникот на општина Дојран Анго Ангов потсетува дека испитувањето на квалитетот на водата на Дојранското езеро е постојана грижа на општината и Министерството за здравство на РСМ кои вршат испитувања преку својата референтна лабораторија во Институтот за јавно здравје:
– „Резултатите од испитувањата на езерската вода се идентични со минатата година, односно, истите ја истакнуваат нејзината непроменета одлична состојба и покажуваат параметри кои не се одразуваат штетно по здравјето на луѓето. Во текот на летниот период од страна на Центарот за јавно здравје, Велес, неколку пати се земаат примероци од езерската вода за нејзино тестирање“ – вели Ангов..
