Во Богданци вчера започнува реконструкцијата на старата водоводна мрежа, каде дотраените азбестни цевки од 50 и повеќе години ќе бидат заменетие со нови, најмодерни, со што ќе се обезбеди чиста вода за пиење за жителите од овој регион.
Стартот со реализација на Овој капитален проект беше повод за посета на Премиерот Димитар Ковачевски, на општина Богданци каде непосредно изврши увид на почетокот на проектот за реконструкција на водоводна мрежа во Богданци. При посетата тој беше придружуван од министерката за животна средина Каја Шукова., како и домаќините градоначалникот Блажо Шапов, пратеничката од овој крај и претставници од локалната самоуправа.
– „Започнува реконструкцијата на системот за водоснабдување во Општина Богданци. Со инвестиција од 4 милиони евра, целосно ќе се обнови и надгради водоводната мрежа. Овој проект има огромно значење за општината, бидејќи овозможува безбеден пристап до чиста вода за пиење и ги минимизира финансиските загуби.
Заедно, создаваме подобри услови за живот во сите општини низ целата држава бидејќи грижата за граѓаните ни’ е на прво место!“ – изјави премиерот Ковачевски во Богданци.
Тој истакна дека ова е исклучително важен проект за оваа општина со што ќе се обезбедат здрава вода за пиење, намалување на финансиските загуби и воведување на високи стандарди за управување со водите во Богданци. Ова е еден од најголемите инфраструктурни проекти за водоснабдување што е целосно финансиран со домашни, буџетски средства, а во неговата имплементација вклучуваме модерни технологии.
Дополнителна вредност на проектот е што парите повторно ќе се вратат назад бидејќи ќе работат домашни компании, со тоа што и материјалите кои се вградени се од компании, едни од најреномираните европски производители на цевки тука од овој крај, како и градежни компании кои работат на проектот.
Министерката за животна средина и просторно планирање, Каја Шукова изјави дека изградбата на оваа инфраструктура во Богданци носи повеќекратни бенефити.
- „Со проекти како што е овој во Богданци, градиме инфраструктура која е директно поврзана со обезбедување на квалитетен живот за граѓаните. Бенефитите се повеќекратни: модерен систем за водоснабдување, чиста вода за над 5.000 жители за овој регион, замена на старите азбестни цевки, спречување на загуба на вода во системот, што значи заштеда на финансии и за домаќинствата и за општината, и најпосле и вклучување на домашни компании со што се развива домашната економија и се отвораат нови работни места“, истакна министерката Шукова.
Градоначалникот на Oпштина Богданци, Блаже Шапов го окарактеризира овој проект како капитален и корисен за жителите на Богданци.
„Здравствените ризици, недостигот од вода во одредени зони во градот, честите дефекти и загуби на вода, непостоење на подземен катастар се причините заради кои се одлучивме на реконструкција на дистрибутивната мрежа за водоснабдување во Богданци. Ваквите капитални проекти освен што ги задоволуваат потребите на граѓаните создаваат услови за раст на локалната економија“, изјави Градоначалникот на Богданци, Блаже Шапов на вчерашното означување на почетокот на реконструкцијата на водоводната мрежа во Богданци.
Изведбата на овој проект чини над 4 милиони евра, со рок на изведба 40 месеци. Со реализацијата на овој проект ќе се обезбеди квалитетна и чиста вода за пиење за 5.000 домаќинствата во Богданци и околината.
Реконструкцијата на водоводната мрежа е обемна активност која има за резултат раскопани улици, оневозможен пристап до домовите и објектите, исклучување на вода – насекаде во Богданци, па од овие причини, Градоначалникот на овој настан упати голема БЛАГОДАРНОСТ заради искажаното огромно трпение и толеранција од страна на граѓаните.
