Царинските работници на Граничен премин „Богородица“ и во енормните гужви од возила и патници остануваат на ниво на својата професионална задача. Вчера, овде царинските службеници спречиле шверц на девизи.
На 18.07.2023 година околу 20:00 часот на излез од државата на граничниот премин „Богородица“ се пријавило патничко моторно возило со српски регистарски таблици, управувано од српски државјанин.
При извршена контрола од страна на царинските службеници во лична ташна на патникот пронајдени се 47.000 евра за кои не поседувал соодветен документ за потекло.
Согласно Законот за девизно работење, на патникот и неговата сопруга – сопатник во возилото, вратени им се по 10 илјади евра (износ што нерезидент може слободно да го изнесе од државата), а останатите 27 илјади евра привремено се задржани.
Согласно законот за девизно работење и Царинскиот закон поднесено е барање за поведување на прекршочна постапка.
