Ново противпожарно возило марка „Форд“ со комплетна опрема за потребите на ТППЕ Гевгелија денеска беше предадено на Пожарна Гевгелија од страна на директорот на ЈИПР.
Возилото е набавено преку Европски проект со средства од ЕУ фондовите преку ИПА програмата за меѓугранична соработка реализиран преку Центарот за развој на Југоисточниот плански регион заедно со Регионот на Централна Македонија, Грција и Центар за управување со кризи, Република Северна Македонија.
Вредноста на возилото е околу 100.000 евра, а набавено е преку проектот “Рано откривање на пожари и нивно движење, за превенција и справување со катастрофи – eFIDAR”.
Пожарникарите со радост и благодарност ја дочекаа донацијата во кругот на Пожарна Гевгелија и изјавија:
– Денеска ТППЕ Гевгелија доби ново возило кое ќе ни биде од голема корист во пожарникарската работа“.
За овие пожртвувани луѓе кои ја сочинуваат единицата на ТППЕ секако дека опременоста во обавувањето на нивната одговорна работа е фактор плус за ефикасноста и брзината за излез на терен каде се најпотребни за солидно справување со настанатата ситуација.
Им посакуваме повеќе елан, а да немаат потреба од интервенции, иако сувата клима и топлото време се еден од ризиците за опожарување.
Вака изгледаше пробното возење со новото ПП возило „Форд“, донирано од ЕУ, што ја реализираа гевгелиските пожарникари.
Од истиот проект денеска возило добија и валандовските пожарникари, нов „пикап“ за прв одговор при пожари.
Според директорот на Центарот Ѓорги Камчев, веќе во процедура е набавка и на трето против пожарно возило-камион за ТППЕ Струмица, кое ќе биде наменето за спасување. Покрај тоа, ќе бидат набавени и три дрона со сензорни камери кои ќе се користат за рано откривање и маркирање на пожари на тешко пристапни места.
