Центарот за социјални работи од Гевгелија во соработка со СОС „Детско село“ од Скопје, одржа втора сесија на обука за згрижувачки семејства на деца без родителска грижа.
Со сертификат за згрижувач на деца без родителска грижа се стекнаа 4 лица: двајца од Гевгелија, по еден од Неготино и Градско. Тие заедно со своите брачни партнери поминаа забрзана обука која траеше не цел месец јули. Сертификатите ги додели директорката на Центарот за социјални работи во Гевгелија, Васка Илиева.
– „Обуката на лица, брачни партнери, современи семејства да се впуштат во извршувањето на оваа хумана и посветена задача беше посебно изведен проект за едукација на истите во рамките на програмата на СОС „Детско село“ од Скопје, а во соработка со Регионалниот центар за социјални работи од Гевгелија. Со првата обука во ноември 2022 во Гевгелија со сертификати за згрижувачки семејства се стекнаа 10 лица. Интересот за оваа хумана работа продолжи и беше одржана втората обука со едукатори од СОС „Детско село“. Сертифицираните згрижувачи се веднаш оспособени за работа со деца и нивно згрижување во својот дом. Едно лице обучен згрижувач од Гевгелија веќе станува роднински згрижувач превземајки ја обврската за нега на деца без родители од свои роднини“ – изјави за GevgelijaNet директорката на ЦСР од Гевгелија Васка Илиева.
Досега, 10 деца без родители од Гевгелија се згрижени кај згрижувачки семејства во други градови од државата. Во Гевгелија двајца згрижувачи превзедоа грижа за три деца без родители. Со новиот роднински згрижувач во Гевгелија таква хумана посвета ќе имаат пет деца од вкупно тројца сертифицирани згрижувачи кај нас.
Центарот за социјални работи за секое згрижено дете без родител доделува парична помош која паѓа на терет на буџетот на Министерството за труд и социјална помитика на РСМ.
„Секое дете мора да расте со љубов“ е мотото на оваа програма за едукација и ширење на згрижувачките семејства во државата.
