Екипата на „Баламов компани“ од Негорци синоќа во големото финале играше победоносно против „Црна река“ Возарци со резултат 4 : 2 со што стана убедлив победник на 34то издание на турнирот во мал фудбал „КМФ Миравци 2023“.
Тимот стана добитник на големата награда во износ од 100.000 денари, а добија победнички пехар и Диплома за своето учество и освоен резултат.
Најзаслужен за победата освен играчите беше голманот на „Баламов компани“ Валентино Милков кој спаси „тешки топки“ како што велат судиите, со што ја освои и наградата „Најдобар голман на турнирот“. Нему му беше доделен пехар, Диплома за учеството и награда голмански ракавици.
Во борбата за 3-то место на т.н. „мало финале“ на теренот се соочија екипите на „Алулпласт Васил“ од Јосифово и „Стамков трејд“ од Гевгелија. Носители на трето место стана „Алулпласт Васил“ со резултат 3 : 2, а четвртото место остана за гевгелискиот тим.
Со пехар, диплома за учество и награда од 50.000 денари се стекнаа и носителите на второ место – „Црна река“ од Возарци. Наградата ја додели „Ескејп травел“ како спонзор на турнирот.
Парична награда од 30.000 денари добија од организаторот третопласираните и 10.000 денари 4-то пласираните на турнирот.
Наградата за најдобар стрелец/голгетер ја освои Слободан Дуков од тимот на „Стамков трејд“ Гевгелија и истата му ја додели Пепи Купанов од фирмата „Купанов“ која е спонзор на турнирот. Покрај пехарот и дипломата од организаторот наградата патики ја обезбеди спонзорот.
Титулата најдобар играч на турнирот ја понесе Ѓорги Стрезовски од екипата на „Црна река“ Возарци. Наградата пехар, диплома и фудбалска топка му беа врачени од претседателот на КМФ Миравци Илија Николов.
Претседателот Николов изрази огромно задоволство од учесниците на турнирот, добрата игра, и фер односи.
– „Имавме извонреден турнир, со бројно учество до 30 екипи, со секојдневна публика, над 2.000 посетители само на финалната вечер. Видовме мирна и чиста игра, што е доказ дека спортот беше главниот порив за учество и спортско дружење на сите во рамките на КМФ Миравци“ – изјави за GevgelijaNet претседеѕелот на турнирот Илија Николов.
Ние само ќе заклучиме дека трииполдеценискиот турнир во мал фудбал во Миравци успева да создава генерации нови спортисти. Доказ за тоа е двојната победа на „Баламов компани“ на турнирот во Миравци, и минатата 2022, и годинава 2023.
Честитки за сите пехароносци!
Повеќе спортски заложби и среќа на терените за сите учесници!
