Матичните лекари отсега ќе може да препишуваат хронична терапија за најчестите болести без пациентот да биде препраќан на специјалист, според точно дефинирани упатства. Ова на денешниот брифинг со новинарите го најавија Министерот за здравство Фатмир Меџити и д-р Злате Мехмедовиќ координатор за реформи за примарна здравствена заштита при Министерството за здравство.
Д-р Мехмедовиќ рече дека со реформите на примарната здравствена заштита практично го децентрализираат системот.
– „Ги доближуваме услугите до граѓаните, нема потреба од закажување преглед кај специјалист за препишување терапија, променет е режимот на препишување на лековите за крвнот притисок, повеќе лекови за контрола на масти кај дијабртичарите, повеќе лекови за астма, ХОББ, повеќе лекови за тироидоза. Матичните лекари имаат повеќе ингеренции може да пишуваат упати кон лабораторија за да го следат пациентот и може да ги препишуваат лековите со исти компетенции, како тоа што досега го правеа лекарите специјалисти. Има два типа на рецепти, едниот е оној што го препишува матичен лекар и еден кој го препишува лекар специјалист. Сега дел од овие лекови ќе може и матичните лекари да го препишуваат, нешто што подолго време го бараа. Нема да се загуби ништо во квалитетот во следење на пациентот“, рече д-р Мехмедовиќ.
Министерот за здравство Фатмир Меџити пак рече дека овие промени се прават во насока да им се олесни на оние граѓани кои не живеат во Скопје, а треба да се препише терапија за некој нивен близок кој не е во можност сам да доаѓа на преглед. Според него со овие промени веќе нема да мора граѓаните да мора да губат ден од работа, за да дојдат да препишат терапија за нивен родител или друг член од семејството.
Тие најавија дека промените во работата на матичните лекари ќе бидат објавени утре во служвен весник, и дека потоа тие веднаш ќе може веднаш да се применуваат.
Одговарајќи на новинарско прашање, тој појасни дека одреден пациент од Крива Паланка, од Ресен или од Струга, што треба да стане во пет часот наутро и да патува со возило, со автобус, да изгуби работен ден, тој што има постари родители и да дојде да потпише за терапија, таа конзилијарната терапија што се препишува само на терцијарно здравство, односно на Клинички центар, отсега натаму ќе се препишува кај фамилијарните доктори.
- „Ова е една од првите големи промени што ќе се случат во примарната здравствена заштита. Знаете, еден таков член на фамилија кога имате болен треба да дојдете во Скопје тој ден да потрошите и ден и да потрошите најмалку за превозни средства околу 2-3 илјади денари и тоа пациентите најдобро го знаат. Ова е првата мерка што ви ја најавив и првиот ден кога стапив како министер со мојот кабинет. И понатаму ќе следат и другите сите промени. Воедно да кажам дека во примарната здравствената заштита еднаш засекогаш правиме децентрализација на здравство, тоа што не успеавме еве со општините, со локалната власт да го направиме индиректно, ние преку примарната здравствена заштита ќе направиме децентрализација тотално на цело здравство низ цела држава. И едно да ви е јасно и на целата јавност дека еднаш засекогаш работите во здравство ќе почнат да се решат кога ќе имаме добра основа, кога ќе ги имаме овие промени во примарната здравствена заштита“, подвлече министерот.
Тој изрази посебна благодарност до Канцеларијата на Светската здравствена организација за континуираната техничка помош и поддршка за зајакнување на здравствениот сектор во нашата држава, како и до сите колеги и соработници, вклучени во процесот, кои активно придонесуваат за унапредување на здравствениот систем и приближување на здравствените услуги поблиску до пациентите.
