Вчерашниот пожар што избувна во атарот на село Селемли, општина Богданци ги ангажираше ПП сили од Гевгелија и Дојран кои успеаја да го стават под контрола, а потоа и ликвидираат вечерта до 20 часот.
На терен беа екипи на ТППЕ Гевгелија со 8 пожарникари и три ПП возила, Доброволното ПП друштво од Дојран со 3 пожарникари и едно ПП возило, ШС „Кожув“ Гевгелија со 7 вработени и теренски возила, лица од Дирекцијата за заштита и спасување и вработени во Центарот за управување со кризи.
– „До 18 часот огнот беше ставен под контрола. Нашата единица заедно со ДППД успеа да спречи пожарот да се упати кон с.Селемлија. Куќите, имотите, нивите и посевите на таможните жители беа под ризик, но ја пресековме таа линија на горење. Пожарот продолжи долж граничната линија и навлезе и на Грчка територија. Тамошните противпожарни сили исто така излегоа на терен и гаснеа од грчка страна“ – изјави за GevgelijaNet командирот на ТППЕ Гевгелија Игор Ризов.
Ова беше долг работен ден за единицата на ТППЕ, осум часови во борба со огнот, чадот и заканите да не се прошири пожарот и загрози нечиј живот или имот. На помош на тимот за гаснење беа и две летала „Ер-трактори“ на ДЗС активирани од ЦУК. Леталата полнеа вода од Дојранското езеро.
![](https://gevgelijanet.com/wp-content/uploads/2023/09/Er-traktor-pozar-Karabalija-750x379.jpg)
Од 18 до 20 часот вработени од ШС „Кожув“ го контролираа опожареното подрачје да не настанат нови самопотпалувања. Ноќта почвата се лади и огнот немаше сила. Утрово нов тим од 12 лица од ШС го контролираа теренот и интервенираа таму каде имало сомнежи за активација на огнот.
Денешната гледка од теренот е жална. Изгоре над 200 хектари шумски појас од квалитетна, но и ниска деградирана шума. Штетата на природата е огромна.
Теренот беше тежок за пожарникарскиот тим бидејќи беше опожарено подрачјето кое за време на војните имало бункери, оставена муниција, експлозивни средства. Во текот на вчерашниот ден беа слушнати и 20 експлозии од опожарената муниција за време на пожарот.
Денеска остана само пепел долж граничната линија со Грција во месноста Карабали.