Македонија го има Балканскиот шампион во полумаратон – атлетичарот Дарио Ивановски победи на Балканското првенство во полумаратон што денес се одржа во рамки на битолската трка „Трчај бе“, што воедно е и најголемиот спортски настан во Битола.
Македонскиот атлетичар Дарио Ивановски освен победата на Балканското првенство во полумаратон успеа да го сруши и Државниот рекорд во полумаратон.
Рекордерот на Македонија во повеќе атлетски дициплини, Дарио Ивановски, истрча 21 км за еден час, четири минути и 45 секунди и го сруши државниот рекорд во полумаратон во машка конкуренција.
Второпласиран беше Ахмет Алканоглу од Турција со време 1:04:25, трет Романецот Стефан Иулис Гавлила со 1:07:42.
Во женска конкуренција победи Луиза Гега од Албанија, една од најголемите балкански атлетичарки, актуелната европската првенка на 3.000 метри стиплчез и финалистка на последното Светско првенство, со време од еден час, 14 минути и 30 секунди. Второто место го освои Маринела Нинева од Бугарија со заостанување од 53 секунди, а трета е Бугарката Девора Аврамова.
Во рамки на „Трчај бе“ се одржа и Државното првенство во полумаратон каде во машка конкуренција на првите три места избија Дарио Ивановски, Жан Тосев и Мартин Трајановски. Во женска конкуренција прва беше Тамара Јолевска-Попов, втора Марија Остојиќ и трета Жанета Богатиновска-Илиева.
Денеска битолската трка „Трчај бе“ прослави пет години. Трките се одвиваа на 5, 10 и 21 километар низ битолските улици, а учествуваа над 1.700 тркачи од различни земји. Трката веќе стана најмасовниот настан за компаниски тим билдинг, па фирми со седиште во земјава кои имаат вработени и соработници од надвор, ги поканија да трчаат заедно во Битола.
Meѓу учесниците имаше и 17 атлетичари од АК „7 Ноември“ од Гевгелија.
Битола и патеката на „Трчај бе“ од оваа година го поседуваат највисокиот сертификат AIMS признат од Светската атлетска федерација, со кој сите постигнати резултати на овие трки ќе бидат меѓународно признати.
Претседателката на Атлетската федерација на Македонија Александра Војнеска-Зикова рече дека ваквите настани се исклучително важни за да се поттикнат младите да стануваат атлетичари.
