Македонската православна црква „Свети Кирил и Методиј“ во Гевгелија овој месец одбележува две години од преосветувањето на црковниот храм, а исто така годинава се навршуваат 127 години од изградбата и постоењето на оваа света македонска црква сместена во средишниот дел од градот Гевгелија.
По тој повод Гевгелиското Архиерејско намесништво подготвува Свeта Архиерејска Литургија на која ќе чиноначалствува Неговото Високоправосвештенство Господин Агатангел со многубројно свештенство.
Настанот е закажан за недела, 17 септември во Црквата „Св.Кирил и Методиј“ во 8:30 часот, а претходно во 08:15 часот ќе биде пречекан Архиерејот.
Инаку чинот на осветувањето на црквата беше изведен на ден 19 септември 2021 година по сеопфатното реновирање на објектот (градежно, електроинсталационо, фасадно) и со изработка на нов фрескоживопис. Овој зафат траеше од 2017 до 2021 година, каде најголем дел изнесуваа работите на фрескоживописот.
За вредноста на црковните добра зборува и фактот што во црквата се наоѓаат девет икони од познатиот македонски зограф Димитар Андонов – Папрадишки. Воедно, црквата се одликува со голем и убав иконостас.
Самата градба на црквата е подигната во 1896 година, што може да се види од натписот на плочата на самата Црква. Таа е изградена на местото каде што во 1881 година бил изграден параклис. Храмот е обновен во 1946 година, а во 1983 година е подигната нова камбанарија со градски часовник.
Новата приватна стопанска економија овозможи блискост на спонзорите со Црквата така што голем дел од фрескоживописот е создаден со донаии од црковни добротвори, а градежните работи се финансирани од редовните приходи на црквата, со средства од Повардарската епархија и со донации од физички лица и верници, во вредност од 5 милиони денари.
Добредојдени сте да присуствувате на Свечената Архиерејска Литургија во недела, каде светите зборови ќе го облагородат црковниот храм повторно, како пред две години, а ќе го облагородат и Вашето присуство и битие.
