Денот на ослободувањето на Гевгелија од фашистичкиот окупатор во далечната 1944 година, 7 Ноември и годинава ќе биде одбележан со низа културни и спортски настани во органзација на јавните установи на локално ниво и спортските организации.
Програмските случувања ќе се одвиваат од 3-ти ноември (петок) па се до празничниот ден 7 ноември (вторник) следната недела.
Чинителите на програмата денеска на прес конференција ги објавија настаните кои за јавноста ќе бидат бесплатни и празнични.
Празничната програма се отвара со Свечена академија на СОУ „Јосиф Јосифовски“ по повод 70 години гимназиско образование во Гевгелија.
На 4.11. (сабота) ќе се одвиваат детските трки и првата инклузивна трка на големиот спортски настан „November Run Gevgelija 2023“. Трките стартуваат од 13:30 па се до 16:00 часот кога гевгелиските улици ќе ги запоследнат над 1.000 деца пријавени за трките од генерација 2017 (6 годишна возраст) и нагоре, до генерација 2010 (13 годишна возраст).
Вечерниот термин е резервиран за пијано концерт на Глигор Гелебешев, музички уметник кој е роден во Гевгелија и овде го завршил и основното музичко образование во музичкото училиште „Васо Карајанов“ во Гевгелија.
Недела, 5.11. се главните трки на стази од 5 и 10 километри од меѓународниот спортски настан „November Run Gevgelija 2023“.
Вечерниот термин е резервиран за манифестацијата „Фолклорен ѓердан“ со настап на КУД од општината и регионот.
Понеделник 6.11. свој термин традиционално за празникот имаат гевгелиските уметници, членови на Друштвото на ликовни уметници од Гевгелија кои творат во Гевгелија и ги сликаат спомените од југот, со вечерен термин во изложбениот салон на објектот АМАМ Гевгелија.
Потоа следува театарската претстава „Аудиција“ на Владимир Милчин со гостување на актерскиот ансамбл на НТ „Војдан Чернодрински“ од Прилеп.
Празничниот ден 7 Ноември ќе започне со полагање свежо цвеќе на спомен обележјата на паднатите борци за време на НОБ од Гевгелија и Гевгелиско. Советот на општината ќе има свечена седница, а чествувањата ќе ги затвори концертот на гудачкиот камерен оркестар „АЈГА“.
Петте дена празнична програма ќе донесе девет настани за публиката, свечена Академија, шест трки, пиано концерт, фолклорна вечер, изложба на уметнички дела, театарска претстава и цвеќе за борците од НОБ.
Нека ти е честита 79-та слободарска годишнина Гевгелија!
