Во чест на Денот на ослободувањето на Гевгелија денеска се одржа спортско славење, познатите улични трки низ Гевгелија, со бројни учесници, публика и поддржувачи, правејќи го денот славенички, празничен, слободрски како во далечната 1944 година.
Уличните трки по речиси четири децении се вратија во градот со сериозниот организатор Атлетскиот клуб „7 Ноември“ од Гевгелија кој за за прв пат ги организираше 2020 година, а од 2021 тие станаа составен дел од општинската програма за одбележување на Денот на ослободувањето на Гевгелија.
Се трчаа шест трки, две за возрасни на патека од 5 и 10 километри, три детски трки во должина од 1 километар и за прв пат инклузивна трка „Run together“ во која учествуваа лица со попречености и нивни поддржувачи и помагатели. На тркачките стази истрчаа над 1.200 возрасни, 620 деца и 680 лица во инклузивната трка. Тоа се вкупно 2.500 учесници што е најголем спортски настан во Гевгелија.
На настанот зедоа учество 60 атлетичари од 15 светски земји со што трката има меѓународен карактер. Меѓу нив беа и државниот првак на Македонија на 10 км Дарио Ивановски, како и првакот на многу Балкански трки, мароканецот Mohamed Chaaboud.
Вака изгледаше утринскиот старт на првата трка од 5 километри.
Вака беше низ улиците во Гевгелија, а секаде попатно со музика и аплаузи гевгеличани ги поздравуваа и бодреа тркачите.
Најмногу поддржувачи и навивање имаше за инклиузивната трка која се одржува за прв пат во Гевгелија и во Македонија.
Пораката беше: „Сите сме заедно, сите трчаме, сите се радуваме на празникот 7-ми Ноември, Денот на ослободувањето на Гевгелија пред 79 години.
На трката задоа учество многу здруженија на граѓани, „Мобилност“ Гевгелија и членови на фондацијата “Ице Бегов”.
Уличните трки во Гевгелија привлекоа многу поранешни спортисти, спортски ентузијасти и активни во рекреативниот спорт. Меѓу нив и ретката слика на братското ткачко трио Ќаеви, кои и покрај 30 годишноата спортска работа наоѓаат време и за уличните трки и славења во Гевгелија.
Денот посветен на трките во Гевгелија беше победнички и за малата ЛАНА ТАНОВА,, – таа е најмалиот учесник на “November Run 2023”. Има само 2 месеца и 10 дена а успеа да ја „истрча“ трката од 1 км за деца од 2017 година и помали. Ете, Лана беше најмала и стана носител на финишер медал. Може ли друг град во Македонија да се пофали со помлад тркач од ЛАНА!?
Задоволната публика, полното шеталиште, бројните помагатели и доброволци за трките, ведрите лица направија трките во Гевгелија да бидат вистински празник на радоста, спортски празник за победниците, слободарски празник за гевгеличани.
Спортското славје продолжи со музичко славје и забавна програма од домаќините.
Честитки и нека трае радоста славеничка!!!
