Вчерашниот празничен ден на 79 годишнината од слободувањето на Гевгелија делегации општественици од градот, здруженија на граѓани, претставници на Сојузот на здружението на борците од НОБ и нивните поддржувачи положија свежо цвеќе во знак на почит и благодарност на споменичните обележја во центарот на Гевгелија, како и на Спомен костурницата на паднатте борци од Гевгелија и Гевгелиско за време на ВСВ.
Со години на овие историски денови без цвеќе, осамени, не спомнати остануваат спомен бистите на останатите гевгелиски борци кои стојат немо за сеќавање и незаборав за својата жртвувана младост и борбеност за слобода.
Вчера, цвеќе беше положено пред спомен бистите на најмладиот загинат борец од Гевгелија Васо Карајанов лоциран во Градскиот парк, на споменикот на Алеко Ќаев и Деко Ковачев, првоборци од Гевгелија, чии споменици се лоцирани кај Железничката станица, пред Споменикот на стреланите жители од Конско, Негорци и жител на Т.Велес, лоциран во Спомен парк шумата во областа на поранешна Касарна.
Почит и наклон искажаа претставници на СДСМ Гевгелија кои не сакаа овие наши заслужни борци да останат не спомнати и не овенчани со цвеќе за нивните заслуги, жртви и положен живот.
Васо Карајанов – Леонид (22.12.1921 – 2.08.1943) роден гевгеличанец, загина во месноста Клуч на Кожуф планина, по неколкучасовна борба со кавадаречката контра-чета. Бидејќи останал без муниција, за да не падне жив во рацете на непријателот, со последниот куршум сам се уби. Така ја одбрал судбината на својот херој Леонид опеан во познатата народна песна „Трба, трби, гевгелиско“ по чие име го добил и својето партизанско име Леонид. Погинува на 17 годишна возраст.
Васо замина во партизани во април 1943 година, заминувајќи со напредни младинци на Кожуф планина и овде помогна да се формира првиот Гевгелиски партизански одред „Сава Михајлов“. Заради својата предаденост и посветеност во работата беше назначен за заменик командант на Гевгелискот партизански одред. Васо беше првата жртва-борец од гевгелискиот партизански одред кој загина на 17 годишна возраст, не дочекувајќи полнолетство, не дочекувајќи слобода, без доживеана младост.
Алеко Ќаев (1922-1981) – политички комесар на Вториот Гевгелиски Народноослободителен партизански одред, формиран од постојната диверзантска група од Гевгелија (период 04.1944 – 21.11.1944), во која тој членувал и дејствувал.
Одредот дејствувал во Гевгелиско и Валандовско, минирајќи ја железничката линија Миравци-Гевгелија, борејќи се против германските и бугарските сили и контрачетниците на своето подрачје, учествувајќи во ослободувањето на населените места и во запоседнувањето на граничната линија с. Ума – с. Конско кон Грција. На непријателските сили им нанеле загуби од околу 140 убиени и значителен број заробени.
Жртвите од Конско и Негорци , стрелани од бугарскиот окупатор:
1. Ѓоргиева Јордана – Конско
2. Деков Илија – Конско
3. Шаренков Димитар – Конско
4. Бојмалиев Ристо – Негорци
5. Димов (Велков) Ѓорги – Негорци
6. Карпузов Борис – Титов Велес
7. Цуклев Ристо – Негорци
Стрелани се во јануари 1944 година во месноста каде сега се наоѓа Спомен парк шумата во поранешна Касарна во Гевгелија.
Вечна слава и незаборав за сите големи борци, кои загинаа во вителот на НОБ против фашистичкото зло, за сите загинати патриоти, поддржувачи и следбеници на антифашистичката алијанса кон која се приклучија македонските борци и борците од Гевгелија и гевгелиско!
