Од 3 до 6 ноемви годинава во Прага се одржа интернационален танцов фестивал, на кој учество зеде и гевгелиското танцово студио „Мystic dance“ и овде „собра“ ШЕСТ НАГРАДИ:
– Четири ПРВИ места ,
– Едно ВТОРО место и
– СПЕЦИЈАЛНА НАГРАДА за најдобра група на Меѓународниот денс фестивал „Прага денс опен“ кој изминатите четири дена се одржуваше во чешката пртестолнина.
Членовите на танцово студио Мистик од Гевгелија освоија 4 први места во следните категории на танци:
– хипхоп трио мини деца,
– MTV стил група деца,
– хипхоп група деца и
– хипхоп соло возрасни.
Второто место е освоено во категоријата:
– хипхоп група возрасни.
– „Причината за второто место беа технички недостатоци на кои нашиот тим направи превид. При повторната изведба, настапот беше бурно примен од публиката присутна на натпреварот и токму нашата група освои една од специјалните награди, поконкретно наградата за најдобра група/формација. Оваа награда подразбира бесплатно учество за целата група на натпреварот во Виена во март 2024 година. Сите освојувачи на прво и второ место добија дипломи и медали, а групите добија и пехари“ – изјави за GevgelijaNet танцовиот тренер на „Мистик“ Александар Аврамов од Гевгелија.
Мистик студио со овој настан ја заврши натпреварувачката сезона за 2023 година, иако оставаме простор и за некој натпревар во државата со оглед на поканите кои ги добиваме овој период, – резимира Аврамов.
На натпреварот покрај гевгелиското денс студио учествуваа танцови студија од повеќе држави меѓу кои Чешка, Полска, Словачка, Литванија, Италија, Слобенија, Хрватска, Србија, БиХ, Црна Гора, Романија, Бугарија и др.
– „Пресреќни сме, што во многу силна конкуренција триумфиравме во повеќе категории. Сите напорни проби, сите подготовки и целиот вложен труд на тимот се покажа дека не било залудно. Најважно е што ние уживавме во нашите настапи и пресреќни се враќаме дома“ – изјавија братучетките Драгана Каракабакова и Лили Панова, за „Нова Македонија“, а инаку тие се дел од танцовото студио „Мистик“.
Студиото „Мистик“ постои веќе 15 години, формирано е од 2008 година како секција по урбани танци при Пионерскиот дом во Гевгелија, а од 2014 година и официјално како танцово студио „Мистик“.
Танцовото студио „Мystic dance“ од 2012 година е дел од интернационалните танцови натпревари. Првиот скромен настап со една детска хипхоп група го имаше на фестивал во Римини, Италија (2012), каде го освои високото второ место, кое на екипата и даде поттик уште поинтензивна, попосветена работа и подготовка за учество на меѓународни натпревари. Во изминатите години студиото „Мистик“ постигнуваше забележителни резултати и на натпреварите во Виена (2015 и 2018 година), Крф (2015) и Прага (2016).
Годинава повторно се навратија на сцената во Прага и со нова сценска постава и танцов ритам се вратија како најдобри со шест награди во силната меѓународна конкуренција.
Видео: А.Аврамов – „Mystic dance“
