За една седница член на Управен одбор ќе прима надоместок од 8.000 денари, а член на надзорен одбор на ЈПКД „Комуналец“ ќе прима паричен надоместок од 5.000 денари.
Ваква одлука денеска донесоа советниците во Советот на Општина Гевгелија со 15 гласа „за“ и еден „воздржан“.
Споредено со висината на досега важечкиот и исплаќан паушал на членовите на Управен одбор кои за седница добиваа надокнада од 6.000 денари, новата одлука на Советот ги наградува со 33,3% покачување, или нето износ од 8.000 денари.
Кај членовите на Надзорниот одбор порастот на паричната надокнада за присуство на седници изнесува цели 150%, односно од досегашните 2.000 денари за присуство на седница на НО, членовите ќе бидат исплаќани по 5.000 денари нето по седница.
Оваа одлука уште во првиот член определува дека месечниот надомест на членовите на управниот и надзорниот одбор на „Комуналец“ Гевгелија НЕ СМЕЕ да го надмине износот од една половина од просечната нето плата на вработените во јавното претпријатие исплатена во претходната година. При тоа е констатирано во самата одлука дека просечната нето плата по вработен во претходната година во претпријатието изнесува 21.589,- денари.
Значи порастот од 33,3% за членовите на УО и 150% за членовите на НО не е плафонот – Одлуката донесена од Советот на општина Гевгелија денеска во своите одредби вели дека можат да бидат наградени најмногу до 1/2 од просечната нето плата, или 10.794,5 денари.
Па скромни биле, или дародавни кон органите на ЈПКД „Комуналец“ Гевгелија, членовите на гевгелискиот Совет, заклучете сами.
Одлуката влегува во сила со денот на објавувањето во Службен гласник на Општина Гевгелија.
