Министерството за земјоделство, шумарство и водостопанство ги известува земјоделските стопанства дека согласно новиот модел на субвенционирање, секој производител кој поднел барање за субвенции за 2023 год. ЗАДОЛЖИТЕЛНО треба повторно да направи електронско пријавување за дополнителните субвенции по површина со доказ или изјава за остварено производство.
Рокот за поднесување на барања за дополнителни субвенции за 2023 год. е од 28.11.2023 година до 25.12.2023 и се врши во просториите на МЗШВ ПЕ Гевгелија секој работен ден од 08ч до 15:30 часот.
Во овој период ќе се дополнуваат барањата за растително производство и тоа за површини со поледелски, градинарски култури, лозови и овошни насади.
Платежната агенција за субвенционирање на земјоделците – Агенцијата за финансиска поддршка во земјоделството и руралниот развој ги известува производителите на поледелски култури (пченица, јачмен, сончоглед, маслодајна репка и афион), градинарски култури, овошје и грозје дека е во тек поднесување на барања од Програмата за финансиска поддршка во земјоделството за 2023 година и тоа за неколку видови подмерки. Издвојуваме кои се износите на субвенциите:
– Висината на дополнителните директни плаќања за пченица, сончоглед и маслодајна репка изнесува 6.000 денари по хектар, за јачмен 12.000 денари по хектар и за афион изнесува 18.000 денари по хектар.
Висината на дополнителните директни плаќања за подмерка 1.5 изнесува 20.000 денари по хектар и истата е условена со минимални просечни приноси и тоа: 20.000 кг/ха за домат, пиперка 15.000 кг/ха, краставица 30.000 кг/ха, корнишони 30.000 кг/ха, зелка 30.000 кг/ха, грав 1.000 кг/ха и компир 15.000 кг/ха.
Висината на дополнителните директни плаќања за подмерка 1.9 е следна:
– Јаболко 30.000 денари на хектар,
– Слива и праска 25.000 денари на хектар,
– Вишна, цреша, кајсија и круша 22.000 денари на хектар,
– Јапонско јаболко, лешник, орев, бадем и калинка 13.000 денари на хектар
Висината на дополнителните директни плаќања за подмерка 1.13 остварено произвдство на грозје изнесува 28.000 денари по хектар.
Висината на директни плаќања изнесува 3 денари по килограм за сите градинарски култури, освен за пиперката од сорта куртовска капија каде висината на директни плаќања изнесува 5 денари по килограм за предадените количини во период мај-јуни 2023 година и ноември-декември 2023 година.
Висината на директни плаќања изнесува 3 денари по килограм за сите овошни видови.
Висината на директни плаќања изнесува 50% од трошоците за лабораториска анализа на физички и хемиски својства на мед направена еднаш во 2023 година.
Постапка
Барањата се поднесуваат во електронска форма со најава во системот
преку линкот „Директни плаќања е-субвенции“ од ВЕБ страната на Агенцијата
„https://www.ipardpa.gov.mk/“. Барањето е потребно да се испечати, потпише и да се достави во писмена форма до Агенцијата преку пошта или директно до Архивата на Агенцијата.
Крајниот рок за поднесување на барањата е 25 декември 2023 година.
