Во пресрет на 3-ти Декември, Светскиот ден на лицата со хендикеп, денеска штитениците на Дневниот Центар од Гевгелија реализираа неколку акции со пораката „И НИЕ МОЖЕМЕ ДА ПОДАРИМЕ“.
Најпрво, тие денеска ја посетија Општа Болница Гевгелија каде со Благодарница и изработена слика со акрилни бои изразија благодарност за соработката со општинската здравствена установа која дава поддршка во функционирањето на Дневниот центар со обезбеден психијатар за редовни психијатриски прегледи на штитениците.
Благодарноста беше искажана кон директорот на ЈЗУ „Општа Болница Гевгелија“ д-р Александар Киров кој имаше разбирање за оваа категорија лица и овозможи психијатар од оваа установа да врши прегледи и надзор над психофизичкото здравје на посетителите на Дневниот Центар на лица со попречености во Гевгелија. Таа задача веќе неколку месеци ја изршува д-р спец. психијатар Сашо Цветковиќ. Благодарниците до двајцата и изработен слика од штитениците подари Васка Илиева Директор на Центарот за социјални грижи од Гевгелија под чија надлежност преку Министерството за труд и социјала работи и функционира Дневниот центар во Гевгелија.
Воедно, екипата која подарува, го посетија и Одделението за Педијатрија при гевгелиската болница и овде на децата пациенти им беа подарени гипсени изработки од штитениците на Дневниот Центар.
Малата радосна екипа која подарува од ДЦ-Гевгелија својата радост ја продолжија со посета на општинските основни училипта во Гевгелија и Богданци. Во текот на денот беа посетени ООУ „Владо Кантарџиев“, ООУ „Крсте Мисирков“ во Гевгелија, ООУ „Петар Мусев“ во Богданци, ООУ „Климент Охридски“ во Миравци и ООУ „Ристо Шуклев“ во Негорци. Овде штиитениците од Дневниот центар на првачињата од 5-те основни училишта им подарија изработки од гипс со мотиви за Новата Година, елки, еленчиња, Дедо Мраз, ѕвезди и сл.
Дневниот центар за лица со попреченост згрижува 20-на лица на возраст од 16 до 28 години и овде освен престој им се пружат аниматорски активности, работилници, спортски рекреативни вежби и дневни оброци на посетителите. За редовно функционирање на активностите и потребни се средства, материјали кои многу често ги обезбедуваат добродушни граѓани, фирми, донатори.
– „Во пресрет на 3 декември, Светскиот ден на хендикепираните лица, Дневниот центар доби донација од Агенцијата за управување со одземен имот. Тоа се платна, материјали за шиење кои нашите корисници од центарот ги употребуваат на активацијата со шиење на машина, која исто така е донација“ – изјави за GevgelijaNet Мери Кузмановска, специјален едукатор и рехабилитатор која работи во Дневниот Центар Гевгелија.
Посебна благодарност беше искажана и за учениците од ООУ „Петар Мусев“ од Богданци кои имале своја хуманитарна донторска акција помеѓу учениците и собрани се основни намирници кои се подарени/донирани за потребите на корисниците од Дневниот Центар Гевгелија.
Ака вака почнува декември, со хуманост и донации, нека продолжи и понатаму добротата на луѓето и кон тие на кои им е потребна помош, и на тие кои од срце сакаат да подарат и израдуваат некого!
СРЕЌЕН 3-ти декември, Светскиот ден на лицата со хендикеп!
