С.Ф. син на поранешниот гевгелиски градоначалник Иван Франгов е возачот кој смртно прегази пешак во Нов Дојран. МВР и Обвинителството не споделуваат што покажале крвните анализи кои се прават за да се утврди дали кај лицето имало присуство на алкохол или дрога. Против С.Ф. се води истрага за делото „тешки дела против безбедноста на луѓето и имотот во сообраќајот“, дело за кое е предвидена затворска казна. Гевгелискиот обвинител, не барал притвор, како што е пракса во најголем дел од ваквите случаи кога има смртни последици, заклучува новинарот К.Ландов за порталот „Скопје1“.
– „Основното јавно обвинителство Гевгелија поведе постапка за „Тешки дела против безбедноста на луѓето и имотот во сообраќајот“ од член 300 став 4 во врска со член 297 став 3 од Кривичниот законик. За осомничениот се побарани и определени мерки на претпазливост. Во тек се наредените вештачења од чии резултати ќе зависи конечната правна квалификација на делото“, велат оттаму за „Скопје1“.
Се обидовме да исконтактираме и со возачот С.Ф., но тој не одговори на нашите повици, истакнуваат од „Скопје1“.
Претходно, МВР извести дека сообраќајката се случила во саботата (09.12.2023 г.), кога со возио „Шевролет“, возач од Гевгелија кој има 26 години, удрил во пешакот Д.Ѓ. кој имал 48 години.
„На местото на несреќата починал пешакот, а смрт констатирал лекар од Итната медицинска помош. Извршен бил увид од Јавен обвинител и увидна екипа од Полициската станица Гевгелија“, велат од МВР.
Случајот е во раце на Обвинителството.
Извор: Скопје1.мк
