Спасени се пет лица кои од саботата попладне беа заробени во словенечката Крижна јама.
Евакуацијата започна околу 14 часот, како што соопшти претходно Сречко Шестан, командант на словенечката цивилна заштита. Тричлено семејство и двајца водичи останаа заробени од саботата поради високиот водостој на околу 2,4 километри од влезот во пештерата. Според Шестан, водата што го предизвикала високиот водостој дошла од правец на Хрватска, што го изненадило инаку искусниот водич.
– „Кога се враќале од пештерата, виделе дека е делумно поплавена, поради што се повлекле на безбедно“, вели Шестан.
Акцијата за спасување започна во саботата попладне, а неколку екипи нуркачи стигнаа до затрупаните лица во последните два дена и им обезбедија се што им беше потребно.
Тричлено семејство со возрасно дете и двајца водичи во саботата во осум часот започна комерцијална обиколка на јамата Крижна како дел од здружението на љубители на јама Крижна. Со оглед на тоа што не излегле од пештерата до 15 часот, дежурниот од здружението се симнал во неа и видел дека водата се крева, па во 17 часот започнал спасувачка акција.
– „Нуркачите со тимот за поддршка што се грижи за транспортот на опремата се собраа во 8 часот наутро. Во 9 часот сите влегоа во пештерата и сега, претпоставуваме, напредуваат. Очекуваме да излезат околу 4 часот и спасувањето да биде успешно завршено. Очекуваме денеска да вечераме дома“, изјави Санди Ќурк, командир на Цивилната заштита за Нотрањска, пренесува словенечко „Дело“.
Така и бидна, семејството и двајцата водачи во 16 часот се извлечени од пештерата.
Пет лица се спасени благодарение на големите напори на спасувачите кои денеска поради падот на нивото на водата им пришле и ги евакуирале надвор.
Евакуацијата траела од 9 до 15:05 часот, кога спасувачите успеале да го извлечат првиот човек на безбедно.
