Територијалната противпожарна единица во Гевгелија во текот на 2023 година имала 365 денови на приправност за акција и 192 изведени акции на терен за спасување на имоти и лица во костец со огнените закани.
Најголем број од интервенциите биле изведени на отворен простор на опожарен терен од шуми, стрништа, ридски терени, итн., вкупно 108 интервенции. Тоа е 56,25% од вкупниот број на интервенции во текот на изминатата година.
Втори по бројност се акциите за гаснење на опожарени објекти, вкупно 47 во текот на годината (или 24,5%). Трети по застапеност се техничките интервенции при спасување од возила во сообраќајни несреќи. Пет акции биле изведени за гаснење на сообраќајни средства, т.е. запалени патнички автомобили, товарни моторни возила, и други сообраќајни средства. Во категоријата „Останато“ се евидентирани уште 11 акции за гаснење на контејнери, ѓубришта, пластичен отпад,
- „Во споредба со 2022 година кога биле евидентирани 141 интервенција на ТППЕ Гевгелија во 2023 година има пораст на акциите на ТППЕ за 36% повеќе. Најмногу пораст бележат пожарите на отворен простор, од 71 во 2022 до 108 акции во 2023 година, изјави за GevgelijaNet.com командирот на ТППЕ Гевгелија Игор Ризов..Летово беа бројни извештаите за пожари на отворено каде како причина се наведува „човечки фактор“.
Инаку, гевгелиските пожарникари работно и огнено ја испратија Старата, исто така работно и огнено ја започнаа Новата 2024 година. На 30 декември 2023 тие успешно изгаснаа пожар во зграда во Богданци, со евакуација на станарите од четирите спрата во зградата, а на Новогодишната ноќ, само 15 минути после полноќ интервенираа во гаснење на опожарена семејна куќа во Миравци и евакуација на неподвижна жена-станарка.
Акциите продолжија и во јануари со уште шест интервенции: гаснење на пожар на отворен простор, гаснење на запален контејнер (2 интервенции на 9 и 14 јануари), интервенција во сообраќајна несреќа кај Фурка, пожар во Мрзенци на фарма, во Богданци на отворен пат.
Секој пожар е закана за губење на материјални добра, па и несреќи, или изгубени животи. Затоа, внимателно со палењето, со запушените оџаци дома, со палењето петарди, контејнери..
Да им посакаме мирна работна сезона на гевгелиските пожарникари од ТППЕ Гевгелија во Новата 2024 и помалку пожари и потреба од акции!
