Јануари е месец на празници, празнични софри, јадења, специјалитети и за едно такво јануарско патешествие со емисијата „Авантурите на Марк“ познатиот кулинар-готвач Марк одрбра да биде Гевгелија и гевгелиските угостители-производители.
Првата дестинација ќе погодите беше Мрзенци и намерата да го вкуси познатото јагнешко печење од угостителскиот бренд „Јавор-Агапи“. На богатата трпеза се најдоа и телешки мускул, пајдак, ребра, плескавицата голема како автомобилска раткапна, сите видови скара, домашна сарма, и традиционални домашни манџи, специјалитет на куќата. Мајсторите на кујната во „Јавор-Агапи“ беа Наце и Ламбе.
Превкусно испеченото месо од јагне кое се топи со само еден допир беше предизвик за очите за Марк кој оцени: „Ова е лапни-голтни“.
Марк продолжи во потрага по најдобрите вкусови од Гевгелија и во слаткарницата „Шар планина“ праша „Што е најдобриот специјалитет тука кај вас во Гевгелија?“
– „Еклер. Ние го имаме најдобриот еклер во цела Македонија“ – самоуверено одговара подмладокот од слаткарскиот бренд „Шар планина“ од големата фамилија слаткари која овде опстојува дури од минатиот век, после Втората светска војна и е фамилијарна гордост на градот.
Maрк го проба гевгелискиот еклер и призна дека е извонреден.
Денот поминат во Гевгелија Марк не можеше да го заврши без посета на локалната винарија чие вино го дегустирал заедно со вкусното јагнешко во ресторанот „Јавор-Агапи“ во Мрзенци, чиј вкус му останал во сеќавање. Стаса и до винаријата „Јостела“ каде го пречека сопственичката енолог Венерка Крстиќ, родена Гелебешева, наследничка на бизнисот на својот татко, познатиот енолог во ЗИК „Винојуг“ во Гевгелија. Винаријата создадена од хоби 2005 година прерасна во семеен бизнис која ја опслужува веќе трета генерација од потомците на Гелебешев.
И, што е карактеристично за гастрономската посета на Марк во Гевгелија?
Иако секогаш носи престилка за да готви заедно со локалните мајстори, Марк во Гевгелија престилката ја подари и остана да ужива во гевгелиските кулинарски специјалитети, зошто овде во Гевгелија „мајсторите на кујната си ја знаат својата работа“.
Па погледнете го воодушевувањето на Марк од мајсториите на гевгелиските угостители, локалните уметници на вкусовите од Југот.
„Преубава прошетка, ние уживавме“ заклучи Марк.
