Денеска по кратко боледување во 73-та година од животот почина Петко Смилков.
Гевгелија го памети како општествено политички работник, професор по математика, директор на СУЦ „Јосиф Јосифовски“ во неколку мандати, поранешен Градоначалник на општина Гевгелија, сопруг, татко и почитуван сограѓанин во средината каде живееше, работеше, другаруваше.
Роден е на 4.09.1950 година во с.Ново Конско, гевгелиско, селото кое покажа непокор на фашистичко-бугарскиот окупатор за време на ВСВ и оттука неговата животна определба да не потклекнува на предизвиците, туку да ги решава со својата мудрост, знаење и организираност.
Основно и средно образование завршил во Гевгелија, а Природно-математички Факултет на Универзитетот „Кирил и Методиј“ во Скопје и по дипломирањето, во 1970-те години станува професор по математика во истото средно училиште во Гевгелија, а подоцна и директор во 1980-те години.
Како младинец станува претседател на Сојузот на социјалистичката младина на Македонија – Општинска организација Гевгелија, во два мандати и освен организацијата на младинските активности испраќа и младинска бригада од општина Гевгелија на доброволна работна акција низ младинските градилишта во тогашна СФР Југославија.
Препознаен по својата организираност, доследност, правичност, угледот кој го уживаше во средината Смилков доби повисока политичка улога – беше избран за претседател на Извршниот Комитет на КПМ за Гевгелија, во средината на 1980-те години. Оваа функција ја добива повторно и по осамостојувањето на Македонија од поранешна СФРЈ во периодот од 2007 до 2009 година, а функцијата имаше ново име – Претседател е на ОО СДСМ Гевгелија.
Во 2000 годна граѓаните на општина Гевгелија му ја доверија функцијата Градоначалник на општина Гевгелија. За време на својот 4-гдишен мандат има реализирано значајни капитални проекти по кои граѓаните го паметат:
– Изградена е Градската капела и извршено е проширување на градските гробишта со нови парцели кон Сува река
– Оформен е денешниот изглед на паркот пред Основниот суд во Гевгелија;
– изградена е санитарна депонија во гевгелискиот регион;
– реновиран е централниот плоштад во Гевгелија;
– формирана е Агенција за развој;
– јазичен и компјутерски центар;
– реконструкција на отворен пазарен дел (стариот пазар );
– мост и улица во населено место Ново Конско, Гевгелиско;
– мост кај населено место – Кованец;
– санација на водоводот во населено место Моин, Гевгелиско;
– Изградба на водовод во Конско и село Хума – Гевгелиско и многу други.
Ова е во аналите на градската архива и одделенијата за урбанизам при општина Гевгелија.
Во аналите на Гевгелија ќе остане запаметен како граѓанин кој ја вложи својата професионална мисла за образованието на младите, својата младинска сила во организирањето на младинскиот живот во општина Гевгелија, својата политичка сила во организирањето и градењето на општествениот и урбаниот живот на Гевгелија и општинските населени места, својот личен живот во градењето на семејството, сожителството, со еден збор ДОСТОЕН ГРАЃАНИН НА ГЕВГЕЛИЈА.
Погребот е закажан утре (петок) во 12 часот на Градските гробишта во Гевгелија.
Вечен спомен професоре!
Петко Смилков (4.09.1950 – 1.02.2024)
