Советот на општина Гевгелија ја донесе Програмата за проекти од областа на културата од интерес за општината за 2024 и одлучи да распредели 7.030.000 денари на 52 културни институции и изведувачи.
Општина Гевгелија преку одвојувања од Буџетот од програмата К4 – „културни манифестации и творештво“ со одвоените средства за културни активности во текот на годината предвидува богат и разновиден културен живот во општината кој треба да опфати различни структури на изведувачи, да анимира публика, па и да развива културен туризам.
Кои се заслужните носители на културните проекти во Општината за кои Советот на општината даде „зелено светло“? Да ги видиме приоритетите:
Највисока ставка од поединечните издвојувања има предвидено кон Детскиот фестивл „Калинка“ , 750.000 денари буџетски средства од локалната каса која ја полнат сите граѓани на општина Гевгелија.
Со висока ставка во Програмата за култура се издвојува и „Скендеровски продукција“ од Скопје за Музички хепенинг „Македонија во срцето те носиме“ – со средства во изност од 700.000 денари од локалниот буџет на Гевгелија. Оваа продукција за прв пат се појавува во Програмата за култура на општина Гевгелија и веднаш го освојува речиси максималниот износ на одвојувања од „буџетскиот колач за култура“ иако не е позната содржината на културната понуда.
Понатаму ќе ги издвоиме: Ансамбл „Бојмија“ со одвоени 180.000 денари за одбележување на 20 годишниот јубилеј на ансамблот и 5 гостувања на фестивали во државата, едно гостување во Шпанија; ЗГ „АРТ-УМ 2023“ Гегелија – 400.000 денари за работилница за млади за музичко инженерство и авторски дела на локални артисти.
Драмска секција, литературна, ликовна секција, секција за гитара, секција за тапани, и Детскиот хор „Божилак“ кои работат при Домот на култура „Македонија“ ќе опфатат 1.231.000 денари локални буџетски средства.
од Програмата за култура Општина Гевгелија како организатор зафаќа средства во износ од 1.200.000 денари, што е 17% од вкупниот „културен колач“ за 2024 година.
Одвоени се 550.000 денари за одбележување на „7ми Ноември“, потоа 150.000 денари за одбележување на Спасовден, кои ги задржува во програмата Општина Гевгелија како организатор на одбележувањата, плус 500.000 денари за „Дополнителни активности“.
Вкупниот буџет за финансирање на културните активности во Општината изнесуваат 7.030.000 денари.
Ако се земе во предвид дека Општината со своите две одбележувања зафаќа 1.200.0000 денари, Активности на Домот на културата „Македонија“ 400.000 денари, секциите при Домот на културата 1.231.000 денари, скопската „Скендеровски продукција“ 700.000 денари, активности на Пионерскиот дом 80.000 денари, активности на библиотеката „Гоце Делчев“ 180.000 денари, Музичкото училиште со 20.000 денари, 80 годишнината од основањето на „Владо Кантарџиев“ со 30.000 денари или вкупно 3.841.000 денари одат во проекти на општински установи и скопска продукција.
Тоа е 54,63% од колачот наменет за култура во Гевгелија за тековната 2024 година.
За локални аматерски ансамбли, локални креатори се извдвојуваат средства од 10.000 денари за поединци до 150.000 денари за КУД „Танец“ Миравци, максималните 180.000 денари за Ансамблот Бојмија“, а најголем пораст во распределбата на средствата има кај ДФ „Калинка“ кој од минатогодишните 300.000 денари, годинава добива 750.000 денари финансиска поддршка.
Значи, 35 локални изведувачи ќе се финансираат со 45,3% од средствата наменети за култура за 2024, а 17 локални установи со 54,65% од средствата наменети за култура од Програмата за културни проекти од интерес за Општина гевгелија за 2024 година.
Соодносот е следен – во просек секој локален изведувач, поединец, КУД, или фестивал ќе добие 91.114 денари од културниот колач за 2024 , а секоја локална институција ќе приграби во просек по 225.941 денари, или дваипол пати повеќе за институциите отколку за локалните уметници, аматери, изведувачи.
Со ваква културна програма гевгеличани првата културна претстава ќе ја имаат дури 46-от ден од годината со претставата „Љубовна терапија“. Локалните активности се очигледно овој период во мирување, па дури и од културните институции во Гевгелија.
Впечатокот е дека КУЛТУРАТА очигледно не е на пиедесталот по буџетските одвојувања, а ниту по роковникот на активности кои го реализираат културните институции во Општината.
Ги очекуваме другите културни изненадувања.
